01 июля 2011 г.
Хисеплĕ Зинаида Андреева! Сухан аялтанах çĕрет пулсан, ку – «скрытнохоботник». Çак нăрă хура тĕслĕ, шурă хупăллă. Çуначĕсем хĕрлĕрех шурă, унта сарă-шурă пайăрсем курăнаççĕ. Нăрă тăршшĕ – 2-2,5 мм. Хурчĕ вара 6,5 мм таран çитĕнет. Сухан çулçине çиет, июнь вĕçĕнче-июль пуçламăшĕнче çамрăк нăрăсем тухаççĕ. Ятарласа çак нăрра пĕтерме кăларнă препарат çук. «Браво» препарата сапма пултаратăр (çумăрлă кунсенче усă курма юрамасть), анчах симĕс сухан çиме юрăхсăр пулать. Тепĕр çул ăна лартнă чухне йăран вырăнне улăштармалла, çĕре сиплемелле.