10 марта 2011 г.
Иртнĕ эрнере Чăваш Республикин потребитель обществисен представителĕсен тата пайтаçăсен отчет пухăвĕ пулса иртрĕ. Унта ЧР экономика аталанăвĕпе суту-илÿ министрĕ И.Моторин та хутшăнчĕ, потребитель кооперацийĕн ĕçне пысăка хурса хакларĕ.
Иртнĕ çул республикăри потребитель кооперацийĕн организацийĕсем пĕтĕм отраслĕпех пысăк тăрăшулăх кăтартнă. Организацисемпе предприятисен ĕç-хĕлĕн пĕтĕмĕшле калăпăшĕ 7 млрд та 860 млн тенкĕпе танлашнă. Иртнĕ çул, 2009 çулпа танлаштарсан, ял халăхне 722 млн тенкĕ ытларах тавар сутнă. Çавăн пекех обществăлла апатлану предприятийĕсен çаврăнăшĕ те чылай ÿснĕ. Хăйсем туса хатĕрленĕ продукцин калăпăшĕ те 60 млн тенкĕ ытларах пулнă. Ахальтен мар ĕнтĕ Чăвашпотребсоюзăн экономикăри тÿпине РФ Тĕп союз канашĕн президиумĕ пысăка хурса хакланă. 2010 çулхи тăваттăмĕш кварталти кăтартусемшĕн вăл пĕрремĕш тата иккĕмĕш вырăнсене тивĕçнĕ. Сăмахран, вак суту-илĕве аталантарнăшăн Атăлçи федераци округĕнче пĕрремĕш вырăна тухнă. Кондитер изделийĕсене чи нумай калăпăшпа туса кăларнăшăн, хăй тĕллĕн çитĕнекен ÿсен-тăрана чи нумай пухнăшăн тата ăна чи нумай туяннăшăн Чăвашпотребсоюза Тĕп союзăн Хисеп грамотипе чысланă.
«Чăн та, кăтартусем япăх мар, - терĕ Чăвашпотребсоюз канашĕн председателĕ В.Павлов. - Пухура 2011-2013 çулсенче Чăваш Республикинче потребитель кооперацине комплексла аталантармалли программăна йышăнтăмăр. Малашне те ял халăхĕпе тачă çыхăнса ĕçлесшĕн эпир. Иртнĕ çулхи шăрăх çанталăка пула утă-улăма, çĕр улмине ытти тăрăхран турттарса килес ĕçе хамăр çине илтĕмĕр. Çавăн пекех халăхран çăм, кивĕ хут, çĕтĕк-çатăк йышăнатпăр. Ял çыннине ĕçпе тивĕçтерессишĕн тăрăшатпăр. Сăмахран, эмел курăкĕсем пухас ĕçе шкул ачисене те явăçтаратпăр. Республикăра иртекен пур мероприятие те хутшăнатпăр. Хамăр ĕç-хĕле кăçал та лайăх шайра тытса тăма тăрăшатпăр».
Отчет пухăвĕнче иртнĕ çулхи тăваттăмĕш кварталта чи лайăх ĕçленĕ республикăри потребитель кооперацийĕн организацийĕсемпе предприятийĕсене чысларĕç. Чăвашпотребсоюзăн куçса çÿрекен ялавне Элĕк райповĕ тивĕçрĕ. Сăмах май, икĕ çул Элĕксем ялава алăран ямаççĕ. «Коллектив туслă пулнăран çитĕнÿсем те куç умĕнчех, _ палăртрĕ райпо пуçлăхĕ Ю.Харитонов. - Халăха таварпа тивĕçтерес тесе тăрăшатпăр. Унсăр пуçне Рязань, Киров тăрăхĕсенчен - улăм, Алтайран çĕр улми илсе килтĕмĕр, ял çыннине сутрăмăр. Çавăн пекех вĕсене чĕрĕ выльăх-чĕрлĕхпе те тивĕçтеретпĕр. Сăмахран, сысна çурипе. Паллах, халăхран аш-какай, сĕт туянассине те йĕркеленĕ».
Пĕтĕмĕшле аталану кăтартăвĕсем тăрăх иккĕмĕш вырăна _ Йĕпреç, виççĕмĕшне Етĕрне райповĕсем тухнине палăртрĕç. Вĕсем Чăвашпотребсоюзăн куçса çÿрекен вымпелĕсене тивĕçрĕç.