Публикации » Çĕнтерÿçĕсен йышĕнче - Тăвай хĕрĕ

02 марта 2011 г.

 Февраль уйăхĕн юлашки кунĕсем Чăваш Ене ырă хыпарсемпе савăнтарчĕç. Вĕсем пурте Сочи хулипе тата 2014 çулта кунта иртекен Олимп вăййисемпе çыхăннă. Февралĕн 26-мĕшĕнче пĕтĕм çĕршыв йĕркелÿ комитетне килнĕ 24 пин ÿкерчĕкрен финала суйласа илнĕ 10 ĕçрен спортăн чи пысăк тупăшăвĕн талисманне палăртнă. Савăнтараканни-тĕлĕнтерекенни - Тăвай районĕнчи Çĕнĕ Пуянкассинчи вăтам шкулта вун пĕрмĕш класра вĕренекен Сильвия Петрова ĕçĕ «сăн ÿкерчĕкре» виççĕмĕш вырăн йышăнни, официаллă талисман йышне кĕни! Ăна кĕçех Раççей Олимп Комитечĕ ятарлă хушупа çирĕплетĕ. Сăмах май, Сильвия хăй те ÿкерчĕксен конкурсне хутшăннă. Мероприятие тÿрĕ эфирта ертсе пынă Иван Ургант Чăваш Ен хĕрĕн ĕçĕ чи лайăххисен шутне кĕнине çĕршыв илтмелле пĕлтернĕ.