16 февраля 2011 г.
Нимĕç фермерĕсем Берлинта хăйне евĕр акци йĕркеленĕ. Вĕсем правительство çурчĕ умне сысна кĕтĕвĕ хăваласа килнĕ. Шăп та лăп çав вăхăтра вара унта ял хуçалăх министерствин ларăвĕ пынă.
Фермерсем хăйсене питех те пысăк тăкак кÿрекен «диоксин хирĕçĕвĕ» çинчен пĕлтересшĕн пулнă. Виçĕ эрне каялла выльăх апатĕнче наркăмăшлă вещество тупнăран çĕр-çĕр хуçалăха хуптарнă, пин-пин выльăха пĕтернĕ. Министрсем выльăх апачĕн пахалăхне тĕрĕслес ĕçе хытарас тенĕ чух фермерсем хăйсем тÿснĕ тăкака саплаштарма ыйтаççĕ.
Ку хутĕнче нимĕç фермерĕсем пысăк çуртра ларакансене кантăк умĕнче тытăнса тăма май панă. Правительство çурчĕ сыснасен çухăрăвĕпе те нăриклетĕвĕпе тулнă. Сысна самăртакансем «диоксин хирĕçĕвĕнче» хăйсене айăпланине йышăнасшăн пулман. Ял хуçалăх министрĕ ветеринари тĕрĕслевне хытарас тĕлĕшпе ятарлă йышăнусен пакетне тăратнă.
Фермерсене аш чĕркемĕ çине выльăха мĕнле-мĕнле апат çитернине çырма хушаççĕ. Анчах та çакă фермерсене нимех те памасть. Вĕсем хăйсен хуçалăхĕсене хуптарнă карантин тăкакне кам тавăрса парассине пĕлесшĕн. Выльăх апатне наркăмăшлантарнă «Харелс» тата «Йенс» компанисем çакна тума пултараймаççĕ, мĕншĕн тесен вĕсем хăйсене панкрута тухнă тесе пĕлтернĕ.
Диоксин историйĕ Германин мĕнпур экономикине тăкак кÿчĕ. Кăнтăр Корея, Венгри çĕршывĕсем нимĕç ашне турттарма пăрахнă. Çулсеренех 350 тонна аш кÿрсе килнĕ Раççей те вăхăтлăха импортран пăрăннă.