02 февраля 2011 г.
Пирĕн çĕршывра «Урожай» физкультурăпа спорт обществине туса хунăранпа кăçал 75 çул çитет. Чăваш Енре ăна 1951 çулта йĕркеленĕ. Пирĕн республикăра çуралса ÿснĕ пултаруллă спортсменсене халĕ тĕнчипех пĕлеççĕ.
Шупашкарта «Урожай» физкультурăпа спорт обществин республикăри организацийĕн отчетпа суйлав конференцийĕ иртрĕ. Унта ялти спорт обществи юлашки пилĕк çулта туса ирттернĕ ĕçсем çинчен асăннă общество директорĕ А.Осипов доклад турĕ. Александр Николаевич физкультурăпа спорт коллективĕсен ертÿçисем, спорт ветеранĕсемпе хастарĕсем халăх сывлăхне çирĕплетес тĕлĕшпе мĕнле ĕçлени, ăста спортсменсем çĕршыв тата тĕнче шайĕнчи чемпионатсемпе турнирсенче, хĕллехи тата çуллахи ялти спорт вăййисен пĕтĕм Раççейри финалти ăмăртăвĕсенче мĕнле тупăшни çинчен каласа пачĕ. Доклада сÿтсе явнă май конференцие хутшăннисем физкультурăпа спорта аталантарас тĕлĕшпе усăллă та вырăнлă сĕнÿсем пачĕç, çитменлĕхсене палăртрĕç.
ЧР физкультурăпа спорт тата туризм министрĕн çумĕ, «Урожай» физкультурăпа спорт обществин пĕтĕм Раççейри Канашĕн президиумĕн членĕ А.Яковлев февраль уйăхĕн вĕçĕнче Çĕмĕрле районĕнчи Турхан ялĕнче республикăри хĕллехи ялти спорт вăййисем иртесси çинчен пĕлтерчĕ. Раççей шайĕнчи ăмăрту вара март уйăхĕнче Омск облаçĕнче иртĕ. Унта ял тăрăхĕсен пĕрлештернĕ командисем тата уйрăм спортсменсем хутшăнĕç.
Конференцие хутшăннă делегатсем пурте пĕр саслăн пулса «Урожай» физкультурăпа спорт обществин республикăри канашĕн председательне ЧР ял хуçалăх министрне С.Павлова суйларĕç.
П.СИДОРОВ.