27 октября 2010 г.
Етĕрнери 1-мĕш гимназин 9-мĕш класĕнче вĕренекен Антон Афанасьев пĕтĕм тĕнчери ача-пăчан «Симĕс экологи» ятлă форумне хутшăнма хатĕрленет.
Вăл 2010 çулхи ноябрĕн 1-мĕшĕнчен пуçласа ноябрĕн 4-мĕшĕччен Мускавра иртĕ. Антон «Пирĕн тĕллев – çĕр çинчи экологие сыхласа хăварасси» конкурса хутшăнĕ, çамрăк экологсен ĕçĕ-хĕлĕпе паллашĕ.
Кăташри пĕтĕмĕшле пĕлÿ паракан вăтам шкулта вĕренекенсем те мĕн пĕчĕкренех тăван тавралăха упрас тесе тăрăшаççĕ, районта хăйсен ырă та пархатарлă ĕçĕсемпе палăрса тăраççĕ. Çут çанталăк тусĕсем йывăç-курăк ÿстереççĕ, çăл куçсене тасатаççĕ... Асăннă пĕлÿ çуртĕнчи 9-мĕшсем Пĕтĕм тĕнчери ача-пăча экологи форумĕн республикăри тапхăрĕ валли «Кăташ ен» пысăк та пуян тĕпчев ĕçĕ тăратнă. А.Афанасьевăн форумра çак тĕпчев ĕçĕпе районпа республика чысне хÿтĕлеме тивĕ.
Сăмах май, «Симĕс планета» юхăма 2003 çулта йĕркеленĕ. Чăваш Ен ачисем форума хастар хутшăнма тытăнни 5 çул ĕнтĕ. 2007 çулта асăннă юхăмăн Чăваш регион уйрăмĕ ĕçлеме пуçланă.
Экологи форумĕ пысăк уяв пек иртет. Унта çулсерен çут çанталăкпа туслă 200-шер ача хутшăнать. Чăваш Ен ачисем те кашнинчех хăйсем маттур та хастар пулнине кăтартаççĕ.