27 октября 2010 г.
Çĕрпÿ районĕнче ял хуçалăх техникине управа лартассипе республикăри семинар-канашлу иртрĕ.
Пухăннисем Çĕрпÿ районĕнчи «ВДС» пĕрлешÿн техника паркĕпе паллашрĕç. Предприяти пилĕк çулта çăмăллăх кредичĕпе, хăйĕн укçи-тенкипе машинăпа трактор паркне тĕпрен çĕнетнĕ. Халĕ кунта энерги ресурсне перекетлекен техника ытларах хуçаланать. Хаклă япалана перекетлĕ тытма, тухăçлă усă курма тăрăшаççĕ. Унччен туяннисем те вĕр çĕннĕн курăнаççĕ, хĕрÿ тапхăрта чăхăмлани пулман-ха. Ăстаçăсен аллинче «хурçă утăн» ĕмĕрĕ те тăсăлать çав. Уй-хир ĕçĕсем вĕçленнĕ май предприятире ял хуçалăх техникине управа лартма хатĕрленĕ. Ретĕн-ретĕн лартса тухнă культиватора, сеялкăна, тĕш тырă комбайнĕсене ертÿçĕсемпе специалистсем тĕлĕнсе те ăмсанса сăнарĕç. ЧР ял хуçалăх министрĕ С.Павлов пĕрлешÿри ĕç-хĕле пысăка хурса хакларĕ. Пысăк укçа хывмасăрах малалла аталанма вăй çитерни, чăн та, савăнтарать. Предприяти ура çинче çирĕп тăни ял çыннисене ĕç вырăнĕпе, шалупа тивĕçтерме пулăшать.
Кăçалхи йывăр çанталăка кура Çĕрпÿ районĕ ял хуçалăх отрасльне аталантарма патшалăхран курăмлă пулăшу илнĕ. Тăхăр уйăхра мĕнпур шайри бюджетсенчен 57,5 млн тенкĕ куçнă. Çакă хуçалăхсене йывăр тапхăрта сывлăш çавăрса яма май пани каламасăрах паллă. Пилĕк çулта районта 161,1 млн тенкĕлĕх ял хуçалăх техники туяннă. Çĕрпÿсем чăрмавсене пăхмасăр кăçалхи тăхăр уйăхра аш-какай, сĕт, çăмарта туса илес плансене тултарнă. Малашне те кăтартăва ÿстерсе пырасса, çулталăка ăнăçлă вĕçлессе шанса тăраççĕ кунта.
Семинар-канашлăва хутшăнакансем пĕр-пĕрин шухăшĕ-сĕнĕвĕпе паллашрĕç, АПКри кăтартусене пĕтĕмлетрĕç.
Л.Никитина.