20 октября 2010 г.
Чăваш наци конгресĕн ĕçтăвком председателĕ, И.Я.Яковлев ячĕллĕ Чăваш патшалăх педагогика университечĕн этнопедагогика институчĕн наука сотрудникĕ, педагогика наукисен кандидачĕ Константин Портнов çак кунсенче Мускавра пулса тĕрлĕ хыпар илсе килчĕ.
Чĕлхе ыйтăвĕсем
Раççей Федерацийĕн Патшалăх Думинче иртнĕ «Раççей Федерацийĕнчи чĕлхесен нумай енлĕхĕ: çивĕч ыйтусем тата малашлăхĕ» парламент итлевне депутатсемсĕр пуçне обществăлла организацисен представителĕсем, экспертсем хутшăнчĕç.
Унта Патшалăх Думин Чăваш Республикинчен суйланнă депутачĕ, ют çĕршывсемпе çыхăнса ĕçлекен Комитет ертÿçи Константин Косачев тухса калаçрĕ. Этнопедагогика институчĕн статусне ÿстерсе Раççей статусĕ парас, ăна валли патшалăх бюджетĕнчен укçа-тенкĕ уйăрас сĕнĕве пурте ырласа йышăннă.
Чăваш ярмăрккинче
Октябрĕн 7, 8, 9-мĕшĕсенче Тагански район управине кĕрекен Таганка пасарĕнче йăлана кĕнĕ «Ылтăн кĕркунне» чăваш ярмăркки ĕçлерĕ.
Çак уява Мускавра пурăнакан чăвашсем чăтăмсăррăн кĕтеççĕ. Ара, чăваш апат-çимĕçне, уйрăмах шăрттана, астивсе пăхсан тăван яла çитсе килнĕнех туйăнать-çке.
Чăваш е чăваш мар?
Мускавра 100 пин ытла чăваш пурăнать. Шута илменнисем тата та нумайрах. Çакăн çинчен Мускаври чăвашсен обществăлла организацийĕсен хастарĕсем Чăваш Республикин представительствинче иртнĕ пухура çивĕччĕн калаçнă.
Халăх çыравне хутшăнакан чăвашсем хăйсене чăваш тесех калĕç-ши е тĕп хулара тĕпленсе пурăнакан вырăссем пулса тăрĕç? Чăваш хăйне чăваш теме вăтаннă вăхăтсем иртсе кайрĕç-ши? Ыйтусем нумай. Хуравĕ Раççейри халăх çыравĕ хыççăн çеç паллă пулĕ.