13 октября 2010 г.
Тăван тавралăх ешĕл те хитре пулнине мĕн çиттĕр; Сип-симĕс катасемпе вăрмансем илем кÿнисĕр пуçне сывлăша та тасатса уçăлтараççĕ. Йăлтăртатса выртакан пĕвесемпе кÿлĕсенчен те уçă варкăш килет.
Санитарипе экологи уйăхлăхĕ пынă май çак кунсенче Муркаш районĕнчи Мăн Сĕнтĕр ялĕнче «Йывăç кунĕ» ирттернĕ. Никам та айккинче тăрса юлман, шкулти мĕнпур вĕренекен тата учитель хутшăннă акцие. Кашниех килтен 5 хунав илсе килнĕ, çавăн пекех Етĕрнери вăрман хуçалăхĕ те тĕмсемпе тивĕçтернĕ. Шкултан вĕренсе тухнă Михаил Захаров та йывăç лартма пулăшнă. Пĕр кун хушшинче кăна пĕтĕмĕшле 400 хыр тата чăрăш, 22 тĕм çулçăллă хунав лартса хăварнă. Вĕсене учительсемпе шкул ачисем пăхса-сăнасах тăрĕç. Ырă та пархатарлă ĕç тунипе вĕренекенсем кăмăллă юлнă. Халĕ вĕсем йывăçсем лайăх чĕрĕлессе кĕтеççĕ.