06 октября 2010 г.
Чăваш Республикин Хĕрарăмсен канашĕ хуласенчи - 5, районсенчи - 24, предприяти-организацири 500 ытла канаша пĕрлештерет. Унăн тытăмĕнче 10 пин ытла хĕрарăм. Асăннă канаш обществăн ытти организацийĕпе, власть тытăмĕсемпе çирĕп çыхăну тытать.
Ялсенчи хĕрарăмсен канашĕн ĕçĕ-хĕлĕпе кăсăкланнă май Патăрьел районĕнчи Турхан ял тăрăхне çитсе килтĕм. Ытти çĕрти пекех кунта та ĕçлет çак йыш. Унăн ертÿçи - А.Ершова.
Асăннă канаш общество организацийĕ шутланнă май чăннипех тăрăшни курăнать-ши; Ара, шалусăр паянхи кун камăн ĕçлес килтĕр; Йăнăшатăп, халăхра паттăрсем çухалман иккен. Тĕрĕссипе чылай мероприяти, уяв районти хĕрарăмсен канашĕ йĕркеленипе иртет.
Кил-çурт, çемье ыйтăвĕ ытларах хĕрарăм çине тиенет. Ахальтен мар канаш членĕсем вырăнти нумай ачаллă тата йывăр çемьесемпе ĕçлеççĕ, вĕсене тăтăшах ларусене чĕнеççĕ.
Ял тăрăхĕнче йĕркеленĕ хăть хăш уява та хĕрарăмсен канашĕ хутшăнать. «Кăçал 50-60 çынран тăракан хор йĕркелеме пултартăмăр, - мăнаçланса пĕлтерет канаш членĕ В.Антонова. - Çĕнтерÿ 65 çул тултарнă ятпа иртнĕ район конкурсне хутшăнтăмăр. Кунта пирĕн йышăн тÿпи çав тери пысăк».
Тĕрлĕ курав йĕркелес енĕпе те хастар ĕçлет хĕрарăмсен канашĕ. Вырăнти ал ĕç ăстисен пултарулăхĕпе ял-йыша та, район çыннисене те паллаштарать. Тĕрлеме, алса-чăлха çыхма кăмăллакансем чылай кунта. Акă Ираида Лешова вĕтĕ шăрçапа ĕçлеме юратать, Надежда Еремеевăпа Клавдия Павлова кавирсем тĕрлеççĕ. Çакна та асăнмасăр иртме çук: Упамсари хĕрарăмсен канашĕ кĕрхи-хĕллехи каçсенче улах йĕркелет. Ал ĕç тунă вăхăтра хĕрарăмсем пĕр-пĕр юрă вĕренеççĕ. Тĕрĕсрех, концерта хатĕрленсе репетици ирттереççĕ. Каярахпа вара ял-йыша хăйсен пултарулăхĕпе паллаштараççĕ. Паллах, çак ырă пуçарăва канаш ертÿçи Галина Вавилова йĕркелесе пырать.
«Ман шутпа, çакнашкал организацисем пурнăçра сыхланса юлмаллах, - тет Вера Алексеевна. - Чылай ĕç пурнăçлатпăр эпир. Мĕншĕн тесен хĕрарăм кил ăшши çеç мар, телей управçи те. Общество ĕçне те хастар хутшăнать вăл».
Çапла, Г.Волков ăсчахăмăр калани те тÿрре тухать: «Тискерленсе пырать тĕнче, çав тĕнчене çăлаканни - хĕрарăм».