29 сентября 2010 г.
2010 çулхи октябрĕн 1-11-мĕшĕсенче Пĕтĕм Раççейри курав центрĕнче «Ылтăн кĕркунне - 2010» агропромышленность куравĕ иртет. Унта «Раççей регионĕсем тата ют çĕршывсем» «апат-çимĕç», «Ăратлă выльăх-чĕрлĕх», «АгроТек Россия» тата ытти выставка йĕркелĕç.
Октябрĕн 1-мĕшĕнче Раççей агропромышленность эрни уçăлĕ. Унта кĕрхи ĕçсене пĕтĕмлетĕç, ял хуçалăх тата тирпейлекен промышленность кунне халалласа савăнăçлă лару иртĕ.
Курав тапхăрĕнче ял хуçалăх продукчĕсене сутса тупăш илме условисем çителĕклех. Кăçал ял хуçалăх продукчĕсен суту-илÿ ярмăрккине Чăваш Енрен чылай хушма хуçалăхпа фермер хутшăнма кăмăл тунă.
Октябрĕн 7-мĕшĕнче Етĕрне районĕнчи Никольски сали патĕнчен республикăран 30 тулли машина çула тухать. Пирĕн ĕçченсем Мускавра пурăнакансене çĕр улмипе, кăшманпа, кишĕрпе, суханпа, пылпа савăнтарĕç.