15 сентября 2010 г.
Елчĕк районĕн централизациленĕ библиотекине ятарласа мар, çула май, пушă вăхăт пулчĕ те - кĕрсе тухас терĕм. Вулавăшра халăх пуррипе çукки, хальхи вăхăтра шкул ачисем мĕн вулани ытларах интереслентерчĕ.
Шăпăрлансен кĕтесĕ
Алăкран кĕрсенех «Шăпăрлан» тесе çырса хуни курăнчĕ. Ку вăл кĕçĕннисен кĕтесĕ. Шалалла кĕретĕп. Пысăк та çутă залра стендсем. Библиотекарьсенчен нумай килет çав. Кĕнекесене куçа курăнмалла, тирпейлĕн вырнаçтарса тухни вулакана тÿрех кăчăк туртать, алă та ирĕксĕрех унта пырать. Кунта шăпах çапла.
Шел те, хальхи вăхăтра кĕнекесемсĕр пурăнма пултараймастăп тенине çамрăксенчен сайра çеç илтме пулать. Мĕн тăвăн, вăхăчĕ те, самани те урăх. Библиотекăна пачах та сукмак хывма пăрахни мар-ха ĕнтĕ. Хăçан мĕнле, кунне 50-шар ача та килет тепĕр чухне. Шкулта пĕр-пĕр кĕнекене тупса вулама хушнипе те, хăйсен ирĕкĕпе те. Чăвашла та, вырăсла та пĕрешкелех вулаççĕ, уйăрни çук», - терĕç пĕчĕккисен уйрăмĕнче.
Ытларах чăвашла
Аслă ăру вара урăхларах. Телевизор курнипе, хаçат-журнал вуланипе кăна çырлахасшăн мар. Кĕнеке вуласшăн. Ытларах чăвашла. Вăрçă, юрату теми çывăхрах аппасемпе пиччесене. Ачаран кĕнекепе çитĕннĕскерсем халĕ те чун апачĕсĕр пурăнма пултараймаççĕ. «Пахчара мĕнле ĕç вĕçленет, библиотекăна çÿрекен те тÿрех нумайланать. Кĕрхи, хĕллехи вăрăм каçсенче вулама çĕнĕрен те çĕнĕ кĕнеке ыйтаççĕ», - теççĕ кунта тăрăшакансем. «Чи нумай вулакан» номинацире кăçал Курнавăшри Вера Никоноровна Миронова çĕнтернĕ. Конкурса тăратнă пур хайлава та шĕкĕлчесе тухнă вăл. Елчĕксем ытти чылай районти пекех В.Шемекеевăн «Ай тăварлă-çке кĕвĕçÿ куççулĕ» кĕнекине алран ямасăр вуланă.
Темиçе тĕрлĕ клуб
Вулавăшра «Çут çанталăк тата эпĕ» клуб уçăлнă. Аслă çултисем, пенсионерсем кăмăлтан çÿреççĕ кунта. Вĕсем валли ятарласа «Мы за здоровый образ жизни», «Простые рецепты здоровья», «60 лет не возраст» журналсем çырăнса илеççĕ. Уйăхра пĕр хутчен тĕл пулаççĕ сывă пурнăç йĕркине тытса пыракансем. Кунта çав кун ятарласа тухтăрсене, аптека ĕçченĕсене чĕнсе илеççĕ. Акă медицина училищи, ял хуçалăх академийĕ пĕтернĕ Александра Сайкина «вăлах асăннă клуб ертÿçи» сиплĕ курăксене хăçан, мĕнле пуçтармаллине, хăш вăхăтра, ăçта типĕтмеллине вĕрентет.
Япăх куракансем пирки те манса кайман библиотека ĕçченĕсем. Кичемлĕхпе пĕчченлĕхрен хăтарас тесе вĕсем валли ятарласа «Шурă туя» клуб уçнă. Сусăрсене хаçат-журналпа паллаштараççĕ, статьясем вуласа параççĕ. Вĕсем валли ятарлă литература та туллиех.
Компьютерпа ĕçлеме вĕренес килет-и, тархасшăн. «Эпĕ тата компьютер» клуба çÿрекеннисем ытларах аслă çултисем. Вĕсен те паянхи çамрăксенчен тăрса юлас килмест. Вĕренес тĕллевпе иртен пуçласа каçчен те ларма хатĕр.
«Çичĕ кĕтрет»
«Елчĕк районĕн çичĕ кĕтречĕ» электрон презентацийĕ - хăй тепĕр пысăк пуянлăх. Район, унăн паллă вырăнĕсем, пултаруллă çыннисем пирки мĕн пĕлес килнине веçех тупма пулать кунта. «Астăвăм хумĕ» ярăма Тăван çĕршывăн аслă вăрçи чарăннăранпа 65 çул çитнине халалланă. Районтан вăрçа 7242 çын тухса кайнă пулсан, вĕсенчен 83-шĕ - хĕрарăм. Паллах, нумайăшĕ паянхи кун çĕр çинче çук ĕнтĕ. Кашнин шăпине тĕпчесе пĕлме йывăр «хăшĕ-пĕри кайран пачах урăх тăрăхра тĕпленнĕ», анчах та чылайăшне сăн ÿкерчĕксемпех вырнаçтарнă. Акă Мария Диомидовна Абрамова 91 çулта пырать халь. Вăрçă нуши-тертне тÿссе курнă хыççăн чылай çул вĕрентекенре ĕçленĕ. «Кашни ветеран çуртне кĕрсе тух» акцие библиотекарьсем кăçал ахальтен ирттерес темен. Ÿркенмен, чăннипех те пур фронтовик патне çитнĕ. «Вăрçă маншăн - вăл ...» альбомра паян районта пурăнакан ветерансен шăпи, пурнăçĕ йăлтах сăнланнă. Кашниех хăй пирки, вăрçăри самантсем çинчен мĕн аса илсе каласа кăтартнине вуласа пĕлме пулать. Ку ĕмĕрлĕх, асăнмалăх...
Вулавăшра çĕнĕлле ĕçлеме пĕлни, паянхи саманапа тан утса пыни алăк урати урлă каçсанах сисĕнет. Пĕчĕккисене илĕртме, халăха интереслентерме, информаципе туллин тивĕçтерме пĕлеççĕ кунта. Иртнĕ çул вырăнти бюджет укçи-тенкипе 100 пинлĕх, федерацинчен уйăрнипе 73 пинлĕх кĕнекесем туяннă. Пĕтĕмпе 142 хаçатпа журнал килсе тăрать халь. Вулавăш чухăн мар. Çапах та пуринчен ытларах ăшăлăх, кунта ĕçлекенсем çынсене тарават йышăнни, кашни вулакана ыр сунса кĕтсе илни туртать пулĕ библиотекăна.