18 августа 2010 г.
Ăруран ăрăва пархатарлă професси суйласа илекен çемьесем тĕлĕнтереççĕ те савăнтараççĕ. Умри çул-йĕре витĕр курса-пĕлсе тăраççĕ темелле. Аслисен опытне тĕпе хурса çамрăксем вĕсем такăрлатнă çула татах анлăлатаççĕ.
Çĕрпÿри Шумиловсен çемйинчен акă 28 педагог тухнă. Чăннипех тарăн та çирĕп тымар. Вĕсем ăс парса пурнăç çулĕ çине тăма пулăшнă çамрăксене шутласа кăлараймăн. Çемьерен тăххăрăшĕ «Халăх вĕрентĕвĕн отличникĕ», «Чăваш Республикин вĕрентĕвĕн тава тивĕçлĕ ĕçченĕ», «Раççей Федерацийĕн вĕрентĕвĕн тава тивĕçлĕ ĕçченĕ», «РФ пĕтĕмĕшле вĕрентĕвĕн хисеплĕ ĕçченĕ», «Чăваш Республикин тава тивĕçлĕ учителĕ», «СССР тава тивĕçлĕ вĕрентекенĕ» хисеплĕ ятсене тивĕçнĕ. Пĕр йăхран тухнă çынсем хăйсен ĕçченлĕхĕпе, пултарулăхĕпе палăрма пултарни _ чăннипех çитĕнÿ. Паллă педагогсем Çĕрпÿ, Йĕпреç, Етĕрне, Муркаш, Шупашкар районĕсемпе Шупашкар хулинче вăй хураççĕ. Хальхи вăхăтра вĕсене Петровсем, Степановсем, Поликарповсем, Фоминсем... хушаматсемпе аван пĕлеççĕ.
Алевтина Петрова акă Шупашкарти виççĕмĕш лицейра вăй хурать. Унăн пĕтĕмĕшле ĕç стажĕ _ 45 çул. Вăл _ Раççей Федерацийĕн тата Чăваш Республикин тава тивĕçлĕ ĕçченĕ. Вĕрентекене кура вĕренекенĕ тенĕ. А. Петрова патĕнче пĕлÿ илнисем аслă шкулсенче математикăна шĕкĕлчекенсем пайтах. Юратнă педагогĕпе кăткăс предмета çăмăллăнах алла илеççĕ лицеистсем,олимпиадăсенче пысăк кăтартусемпе савăнтараççĕ. Алевтина Серафимовна Сорос премине ултă хут илме тивĕçнĕ. Чăваш патшалăх педагогика университечĕн физика преподавателĕ Валерий Серафимович Шумилов _ Чăваш Республикин тава тивĕçлĕ учителĕ, Раççей Федерацийĕн пĕтĕмĕшле пĕлĕвĕн хисеплĕ ĕçченĕ. Вăл çичĕ çул Шупашкар районĕнчи вĕрентÿ пайне ертсе пынă, 18 çул шкул директорĕнче тăрăшнă. Кирек ăçта ĕçлесен те хăй хыççăн тарăн, ырă йĕр хăварнă. Раççей Федерацийĕн пĕтĕмĕшле вĕрентĕвĕн хисеплĕ ĕçченĕ Елена Филимонова вара Етĕрнери наци гимназийĕнче 28 çул химипе вĕрентет.
Шумиловсем тăрăшнипе тавра курăма анлăлатма, пĕлĕве ÿстерме пулăшакан вун-вун кĕнеке кун çути курнă. Вăрçă тата ĕç ветеранĕ, чăваш чĕлхипе литература вĕрентекенĕ Георгий Шумилов орфографи словарĕ тата вĕрентÿ пособийĕсем хатĕрлесе кăларнă. Евгений Шумилов, Игорь Поликарпов та тĕпчев ĕçĕсем пичетленĕ. Кĕçĕн классенче вĕренекенсене 35 çул пĕлÿ тĕнчине алла илме пулăшнă. Мария Фомина «Амăшĕн мухтавĕ» медале тивĕçнĕ. «Вĕрентÿ» наци проектне пурнăçа кĕртессишĕн вăй-халне шеллемеççĕ вĕсем, кун-çулпа тан утаççĕ, вĕрентĕве, ĕç-хĕле çĕнĕлĕхсемпе пуянлатаççĕ. Чăннипех хисепе тивĕçлĕ Шумиловсем. Учительсен династийĕпе мăнаçланма пултарать çак çемье. Ара вĕсен педагогикăри пĕтĕмĕшле ĕç стажĕ - 613 çул!
Ăрусен çыхăнăвне çирĕплетекен, пĕлÿ тĕнчинче вăрлăх акакан çемье - Çĕрпÿ районĕн хисеплĕ шанчăкĕ, тĕрекĕ.