13 августа 2010 г.
РФ Пенси фончĕн Чăваш Енри уйрăмĕн комисси ларăвĕнче ку хутĕнче Вăрмар районĕнчи парăмçăсем страхлав взнозĕсене епле тÿлесе пынине тишкерчĕç.
– Кăçалхи пĕрремĕш кварталшăн район организацийĕсен обязательнăй пенси тата медицина страховани умĕнчи парăмĕ 800 пин тенке çитнĕ, – пĕлтернĕ Вăрмар районĕн Пенси уйрăмĕн пуçлăхĕ Т. Васильева. – Çак уйăхран иккĕмĕш кварталшăн шыраса илме пуçлатпăр.
Бюджет организацийĕсем, чăх-чĕп фабрики, райпо, «Общепит», «Надежда», «Гермес», «Майя», «Мария», «Алекс» предприятисем взноссене вăхăтра та туллин тÿлеççĕ. Автотранспорт предприятийĕпе С. Харитонов предприниматель пирки вара çакна калаймăн.
Халăхăн йăла ыйтăвĕсене тивĕçтерекен комбинат клиентсене илĕртессишĕн çине тăрса ĕçлет, йÿнĕ хакпах тĕрлĕ пулăшу кÿрет. Анчах та Пенси фончĕ умĕнчи парăмсене вăхăтра татаймасть. Сентябрь варриччен унăн иккĕмĕш кварталти парăмсене те татас пулать.
«Юман» директорĕ Н. Петров вара канашлусене пачах та çÿремест, парăмне те татмасть. Ахăртнех пурлăхне туртса илессе кĕтет.
«Арабоси» агрофирма Вăрмарта элеватор тума пуçласан Америкăран оборудовани туянма заказ тунă, анчах та хатĕрĕ таможньăра лакса ларнă. Чикĕ хĕрринче ларнăшăн тÿлеме тивет, Пенси фончĕ умĕнчи парăм вара кунсерен ÿсет.
Н. Тимофеева уйрăм предприниматель парăмне хăй ирĕкĕпе август уйăхĕ вĕçлениччен татма шантарать. Комисси вара ăна куçран вĕçертмĕ.
РФ Пенси фончĕн
Чăваш Енри уйрăмĕ.