28 июля 2010 г.
Çĕрпÿре «Асамат» физкультурăпа спорт комплексĕ хута кайрĕ. Республикăри çирĕм пĕрремĕш чаплă кермене уçма Чăваш Ен Президенчĕ Н.Федоров хутшăнчĕ.
- Чăваш Республикинче культурăпа спорт керменĕсене тăвасси вĕçленсе пырать. Çак комплекссем çирĕп сывлăхлă, интереслĕ, конкуренцире пултаруллă пулма талпăнакансем валли. Ĕмĕте пурнăçа кĕртме мĕнпур услови пур, - терĕ президент. - Эпир çĕнĕ йышши спорт, тренажер тата хореографи залĕсемпе, бассейнпа тата ытти енĕпе пуян. Çаксем пурте çирĕп малашлăхшăн.
Районта пурăнакансене савăнăçлă уяв ячĕпе саламланă май Н.Федоров çĕнĕ кермене, унта çÿрекенсене «ГАЗель» автомобиль парнелерĕ. Малашне микроавтобуспа аякри ялсенчен те çăмăллăнах сывлăха çирĕплетме çÿреме пулĕ.
Хăнасем, Çĕрпÿсем çĕнĕ спорткомплекспа кăсăкланса паллашрĕç. Пысăк та çутă, илемлĕ залсенче тренировкăсем, ăмăртусем, ытти мероприяти ирттерме вырăн çителĕклех. Районта пурăнакансем уйрăмах бассейна хĕпĕртесе йышăнчĕç. Кун пек чаплă кермен чăннипех пысăк парне вĕсемшĕн. Спортсменсемпе пĕрлех инвалидсен те сывлăхне çирĕплетме майсем пур. Вĕсене валли тренажер залĕнче вырăн, оборудовани çителĕклех. Ан ÿркен кăна.
Республика ертÿçи спорткомплекссене çынсене, çамрăксене ытларах явăçтармаллине палăртрĕ. Çурма пушă керменсем никама та усă кÿмĕç. «Пире сывă наци кирлĕ», - терĕ вăл.
Пĕр-пĕрин опычĕпе, физкультурăпа спорт комплексĕсен ĕçĕ-хĕлĕпе паллашма Çĕрпÿ-Шупашкар-Йĕпреç-Çĕмĕрле он-лайн режимĕпе телекĕпер те йĕркелерĕç. Унта аслисемпе пĕрлех ачасем хутшăнчĕç, спорт центрĕсем пулăшнипе тунă çитĕнÿсемпе паллаштарчĕç.
«Асамат» комплекса 2009 çулта тума пуçланă. Ăна çĕклеме 70,11 миллион тенкĕ тăкакланă. Объекта кăçалах хута яма республика бюджетĕнчен тата 45 миллион тенкĕ уйăрнă. Ĕçсене пурнăçлама Пĕтĕм Раççейри «Единая Россия» политика партийĕн социалла проекчĕпе тата республикăн «2007-2010 çулсенче Чăваш Республикинче физкультурăпа спорт аталанăвĕ» тĕллевлĕ программипе уйăр-нă укçапа усă курнă.
Л. Алексеева.