21 июля 2010 г.
Чăвашстат ертÿçин çумĕ П. Краснов пĕлтернĕ тăрăх, Пĕтĕм Раççей çыравне ирттерме хатĕрленнипе пĕрлех статистика органĕсен федераци саккунĕпе тата РФ Правительствин йышăнăвĕпе килĕшÿллĕн 2011 çулта кăçалхи кăтартусем тăрăх пĕчĕк тата вăтам предпринимательлĕх субъекчĕсен пĕтĕмĕшле тишкерĕвĕ иртмелле. Ăна пилĕк çулта пĕр хут йĕркелемелле. Раççейре ăна пуçласа ирттереççĕ.
Юридици вăйĕнче тăракансене тата юридици тĕлĕшĕнчен йĕркеленмесĕр предприниматель ĕçне пуçăннă уйрăм çынсене шута илĕç. Чăваш Енре 61 пине яхăн предпринимательлĕх субъекчĕ теççĕ, вĕсенчен 46 пинĕшĕ уйрăм предпринимательсем.
Паянхи куна пĕчĕк предприятисен тата уйрăм предпринимательсен ĕçне сăнамалли статистика формисене çирĕплетнĕ. Отчетсене 2011 çулхи апрелĕн 1-мĕшĕччен Чăвашстата çитермелле.
Ĕçлекен хуçалăх субъекчĕсене туллин тупса палăртни питĕ пĕлтерĕшлĕ пулмалла. Çакна вара статистика органĕсем патшалăх влаçĕн, вырăнти хăй тытăмлăх тата ытти организаципе тачă çыхăнса ĕçлесен кăна пурнăçлама пултараççĕ. Çавăн пекех федерацин налук службипе, Раççей Пенси фончĕпе, федерацин ытти тытăмĕсемпе çыхăну тытма тивĕ.
Чăваш Республикин статистика уйрăмне пулăшма ЧР Министрсен Кабинечĕн йышăнăвĕпе килĕшÿллĕн ятарлă ĕç ушкăнĕ йĕркеленĕ. Ăна суту-илÿпе экономика аталанăвĕн министрĕ И. Моторин ертсе пырать.
Тишкерÿ вăхăтĕнче илнĕ информаципе пĕтĕмĕшле майпа кăна усă курĕç. Вăл е ку юридици вăйĕнче тăраканăн е предприниматель ĕç-хĕлне уйрăммăн палăртмĕç.
Е.НИКОЛАЕВА.