16 июля 2010 г.
Чăваш Республикин Министрсен Кабинечĕн 2010 çулхи июлĕн 6-мĕшĕнчи постановленийĕпе килĕшÿллĕн, 195 çынна «Ĕç ветеранĕ» хисеплĕ ят панă, 15 çынна -«Чăваш Республикин ĕç ветеранĕ» хисеплĕ ят тивĕçнĕ. Саламлатпăр!
Çăмăллăх вырăнне - укçа
Ялсенче пурăнакан тыл ĕçченĕсене мĕнле çăмăллăхсем параççĕ? Маларах вутă та пулин килсе тăкатчĕç.
А. Филиппова.
Шупашкар районĕ.
Чăваш Республикин «Чăваш Республикин ĕç ветеранĕсене тата ĕç ветеранĕсене, вăрçă çулĕсенчи тыл ĕçченĕсене социаллă пулăшу парасси çинчен» саккунпа килĕшÿллĕн хальхи вăхăтра мĕнпур çăмăллăха уйăхсерен укçа парассипе улăштарнă. Тыл ĕçченĕсемшĕн вăл виçе паянхи куна 745 тенкĕпе танлашать.
Пулăшу палăртман
Эпĕ вăрçă участникĕн тăлăх арăмĕ. Хам пурăнакан уйрăм çурта юсама укçа-тенкĕ пулăшăвĕ илме манăн ирĕк пур-и?
Е. Парфенова.
Етĕрне районĕ.
Раççей Федерацийĕн саккунĕпе килĕшÿллĕн, тăрантаракана çухатнă çар служащийĕсен çемйисене кăна пурăнмалли уйрăм çурта юсама укçа уйăрма пăхса хăварнă. Тăван çĕршывăн аслă вăрçине хутшăннă çемьесен членĕсене ку категорие кĕртмен.
Вăрçă участникĕн тăлăх арăмĕсене çурта юсама укçа пулсан вырăнти администраци пулăшма пултарать.
Тыл ĕçченĕсемшĕн _ çук
Вăрçă çулĕсенчи тыл ĕçченĕсене ритуал пулăшăвĕн çăмăллăхĕсене параççĕ-и?
М. Климова.
Тăван çĕршывăн аслă вăрçи участникĕсене кăна патшалăх шучĕпе палăк лартса параççĕ.
Енчен те вăрçă участникне арăмĕн, çывăх е ытти тăванĕсен шучĕпе пытарнă пулсан, вĕсене 4 пин тенкĕ чухлĕ социаллă пособи тÿлеççĕ.
Паллăна кĕртмен
«Коммунизмла ĕç ударникĕ» паллă «Ĕç ветеранĕ» хисеплĕ ят илме ирĕк парать-и?
З. Давыдова.
Канаш.
Шел пулин те, «Коммунизмла ĕç ударникĕ» паллăна СССР, РСФСР, Раççей Федерацийĕн патшалăх влаçĕн ĕçре палăрса тăнăшăн «Ĕç ветеранĕ» ят паракан ĕç органĕсен ведомство паллисен переченьне кĕртмен. Çавăнпа та сирĕн «Ĕç ветеранĕ» ят илме ирĕк çук.