15 июля 2010 г.
Хĕвелпе пĕрлех ĕçе тытăнаççĕ Шупашкар районĕнчи Карантайкассинче пурăнакан Валентина Никоноровнăпа Анатолий Феофанович Корольковсем. Иккĕшĕ те çичĕ теçетке урлă каçнă. Пĕрлешсе çемье çавăрнăранпа та аллă çул иртнĕ. Кил хуçи ирех картишне шăлса тасатать, выльăх-чĕрлĕхне апатлантарать, мăшăрĕ ĕне сăвать. Унтан тумтирне улăштарать те пирвайхи автобуспа Шупашкара сĕт сутма каять. Кунта унăн хăйĕн клиенчĕсем пур. Хĕлле те, çулла та сĕтпе тивĕçтерет вĕсене.
- Выльăх-чĕрлĕх тахçанах тытатпăр, - тет Валентина Никоноровна. - Сĕт сутса тупăш илни ытти кирлĕ тавар туянма май парать. Мăшăрăм пенсие тухичченех хуçалăх ферминче ĕçлерĕ. Çавна май выльăх-чĕрлĕх пăхма кăмăллать. Ачасем те мĕн пĕчĕкрен кил тĕрĕшри ĕçсене хăнăхса ÿсрĕç. Пурте пурнăç çулĕ çине тухрĕç.
Корольковсен ачисем вара йышлă: тăватă ывăлпа икĕ хĕр. Аслă ывăлĕсем Сашăпа Коля мĕн пĕчĕкрен техникăпа интересленеççĕ: пĕри - шофер, тепри - механизатор. Надя ялти пекарньăра çăкăр пĕçерет, Лена медсестрана вĕренсе тухнă. Андрей Шупашкарти аш-какай комбинатĕнче вăй хурать. Кĕçĕннин, Юрăн, кун-çулĕ вара пурне те пăшăрхантарать. Кÿкеçре ĕçлет вăл, милиционер. Темиçе хутчен те Чечняна командировкăна кайса килчĕ. Халĕ татах Кавказра.
Корольковсен ывăлĕсем пурте хĕсметре пулнă. Мăнукĕ Алеша та салтака кайса килчĕ, каярахпа çемье çавăрчĕ. Халĕ вăл шоферта ĕçлет. Тепĕр мăнукĕ Володя Новосибирск хулинче хĕсметре тăрать.
Ывăлĕ - Кавказра, мăнукĕ - Çĕпĕрте... Вĕсем çуралнă тăрăха тĕрĕс-тĕкел, сывă таврăнасса куç пек кĕтеççĕ ватăсем.
Л.ЛАЗАРЕВА.