09 июля 2010 г.
Ĕнер, Çемье, юратупа шанчăклăх кунĕнче, 50 е ытларах çул пĕрле пурăннă çирĕп те туслă мăшăрсене ЧР Президенчĕ «Юратупа шанчăклăхшăн» орденпа чысларĕ. Сăмах май, асăннă уява Раççейре кăçалхипе виççĕмĕш çул çеç палăртаççĕ. Ăна сăваплă Петĕрпе Феврони ячĕсемпе çыхăнтараççĕ.
«Юратупа шанчăклăхшăн» ордена Чăваш Республикинче çемье институтне çирĕплетес, кăмăл-сипет пуянлăхне аталантарас тĕлĕшпе йĕркелеме йышăннă. Кун пек награда хальлĕхе Раççей Федерацийĕн пĕр субъектĕнче те çук. Унăн эскиз проектне Раççей Федерацийĕн тава тивĕçлĕ художникĕ В. Николаев хатĕрленĕ.
Асăннă наградăна пирвайхи хут республикăри тĕрлĕ районта пурăнакан 11 çемье тивĕçрĕ. Вĕсен шутĕнчех пурнăç çулĕпе 64 çул пĕрле утакан мăшăр та пур. Вĕсем - Елчĕк районĕнчи Кавал ялĕнче пурăнакан Надежда Сосипаторовна Зайцевăпа Гурий Ефимович Теллин. Туслă мăшăр пилĕк ача çуратса ÿстернĕ. Паян вĕсемпе, мăнукĕсемпе савăнаççĕ ватăсем.
«Çĕр çинче эсир пурришĕн савăнатпăр, - терĕ Н. Федоров мăшăрсене саламланă май. - Эсир - Чăваш Ен пуянлăхĕ. Сиртен çамрăксем тĕслĕх илеççĕ». «Çемье - çĕршыв, общество тĕрекĕ, - терĕç мăшăрсем. - Ырă çемьере вара ырă ачасем çитĕнеççĕ».