07 июля 2010 г.
Сысна грипĕ «А/Н1N1» пулман. Çакнашкал пĕтĕмлетÿ патне пырса тухнă Европа Совечĕн Парламент ассамблейин сывлăха сыхлас ĕç комиссийĕ. Пĕтĕм тĕнчери сывлăха сыхлас ĕç организацийĕ вара çакна хирĕçлет, грипп халĕ те пырать тесе çирĕплетет.
Парламент ассамблейин шучĕпе А/Н1N1 грипп пирки халăха сăлтавсăрах сехĕрлентернĕ. Çакă пульницасене тултарса лартнă, патшалăх бюджетне сапаланă «вакцинăсем туянма укçа уйăрнă, анчах эмелĕпе усă курман». Экспертсем Пĕтĕм тĕнчери сывлăха сыхлас ĕç организацийĕпе вакцина туса кăларакансене кавар тунă тесе айăплаççĕ.
Анчах та сывлăха сыхлас ĕç организацийĕ сысна грипĕ хальхи вăхăтра тропика районĕсенче вăйлă аталанни пирки пĕлтерет. Вĕсен шучĕпе чир çитес вăхăтра Кăнтăр Африкăна, Латин Америкине, Австралие тата Çĕнĕ Зеландие куçать.
Раççейре 2009-2010 çулсенче сысна грипĕпе тата ОРВИпе 13 миллион çын чирленĕ-мĕн, умĕнхи эпидеми сезонĕнчен 6 млн çын нумайрах. Ытларах 18-39 çулти çынсем аптранă. Пур регионта та йывăр чирленĕ тĕслĕхсем пулнă, çавăнпа çитес сезонра та вакцинаци тăваççĕ, мĕншĕн тесен çĕнĕ вируссем халăх хушшинче 10-20 çул çÿреççĕ.