Публикации » Çичĕ нота вăйĕпе

16 июня 2010 г.

 Хитре, çепĕç те тарăн шухăшлă юрăсене чунтан парăннă хăш-пĕр çын хальхи шавлă кĕвĕсем халăх юрри-ташшине путарса манăçа хăварасран пăшăрханать. Шантарсах калама пулать вĕсене: Муркаш районĕнчи Ситуккассинче пурăнакан Надежда Максимилиановна Кондукторова пек «çулăмлă» çынсем пур чухне пирĕн юрă-ташă пур та, пулĕ те! Алран кайми хут купăсĕпе вăл çичĕ нотăн асамлăхне нумай ÿстерет. Çĕр пин хут янранă юрра хăйĕн чун хĕлхемĕпе, çепĕçлĕхпе пуянлатса çĕр пин те пĕрремĕш хут пурин патне те çитмелле, киленмелле шăрантарать. Унпа вăл çамрăк ăрăва та «чирлеттерсе» халăх йăли-йĕркин никĕсĕсем патне тавăрма, çĕре, халăха хисеплес туйăмсене вăратма пултарать.