05 мая 2010 г.
Хĕрлĕ Чутай тăрăхĕнче Аслă çĕнтерÿ уявĕ çывхарни пур çĕрте те сисĕнет. Сарлака та типтерлĕ урамсене ялавсемпе плакатсем илемлетеççĕ. Район администрацийĕ умĕнче вăрçă паттăрĕсене халалласа лартнă палăк юсаса çĕнетнĕ хыççăн тата мăнаçлăн курăнса ларать. Ăна кăна-и, районти ытти объектпа асăну хăмине те пăхма кăмăллă. Культура çурчĕ умĕнчи фонтан куççуль пек тăп-тăрă шывне каллех сапма пикенчĕ. Çывăхри пушă тенкелсем самантрах çынсемпе тулчĕç. Мĕн тăвас тетĕн, ватти-вĕттин юратнă вырăнĕ ку.
- Аслă çĕнтерÿ кунне кĕтсе илме район пуçлăхĕн йышăнăвĕпе ятарлă комисси йĕркеленĕ, - каласа парать администраци ертÿçин çумĕ Татьяна Шереметьева. - Чи малтан, паллах, вăрçă ветеранĕсене, тăлăх салтак арăмĕсене пулăшассипе, вĕсене хăтлă хваттерпе тивĕçтерессипе вăй хутăмăр. Кашнин килне çитсе ятарлă комисси çурт-йĕр условийĕсене тишкерчĕ, акт çырчĕ. Хваттер черетĕнче 35 çын тăрать. Çав шутран 28 вăрçă ветеранне çурт-йĕре лайăхлатма сертификат панă. Районта хальхи вăхăтра 79 фронтовикпа 290 тăлăх салтак арăмĕ пурăнаççĕ. Вăрçă вут-çулăмĕ витĕр тухнă 14 çын пĕчченех кун кунлать. Ватăсен çурт-йĕр тытса тăма вăй-халĕ, укçи-тенки çителĕксĕр. Нумайăшĕн мĕнпур хăтлăх «шыв, канализаци» урамра. Акă Питĕркассинчи В.Гаврилов ветеран çурчĕ юхăнсах çитнĕ. Ăна темле юсасан та пÿртре ăшă тăмасть. Атнарти А.Чумаковшăн, Вырăсушкăнĕнчи Е.Алексеевшăн, Хурашашри Е.Захаровшăн тата ытти ветераншăн ватлăхра хăтлă хваттерте пурăнма тÿр килни чăннипех ырлăх.
Е.Захаров сертификат илнипе тата тăванĕсем пулăшнипе Хĕрлĕ Чутайра икĕ пÿлĕмлĕ хваттере тивĕçнĕ. «Çулла ялтах пурăнатăп, чун-чĕре унтах туртать. Анчах хĕлле çĕнĕ çуртăмах куçăп», - савăнăçне пытараймасть вăл.
Çурт-йĕре, хваттерсене вăрçă инваличĕсемпе унта хутшăннисем хăйсем е тăванĕсем пулăшнипе суйласа илеççĕ-мĕн. Хăшĕ Хĕрлĕ Чутай енчех юлма кăмăллать. Теприсем тăванĕсен çывăхне - Шупашкара, Çĕмĕрлене, Етĕрнене куçма кăмăл тунă.
Вăрçă ветеранĕсене, салтак арăмĕсене район тĕп больници диспансеризаци ирттерсе сывлăхне тĕрĕсленĕ, медицина пулăшăвĕ панă. Медицина ĕçченĕсем тухса çÿрейменнисем патне çитсех пулăшнă.
Районта «Аякри ветерансене халăх тимлĕхĕ тата пулăшăвĕ» акци йĕркеленĕ. Шкул ачисем куллен шефа илнисем патĕнче пулаççĕ. Çакă çамрăк тата аслă ăрăва пĕр-пĕрне ăнланма, хисеплеме вĕрентет, çыхăнăва çирĕплетет. Ача-пăча ветерансем Совет çарĕн вăрçăри паттăрлăхĕ пирки каласа панине хапăлласах итлет. Хаяр çапăçу витĕр тухнисем паян нумай юлман, «чĕрĕ палăксем» пире истори чăнлăхне уçса пама, ăна ĕмĕрлĕхех çирĕплетсе хăварма пулăшаççĕ.
- Уяв программи анлă, пысăк, - тет Татьяна Николаевна, - «Çĕнтерÿ салючĕ» халăх пултарулăхĕн фестивалĕпе килĕшÿллĕн районти юрă-кĕвĕ ушкăнĕсем, алă ăстисем уява илем кÿрĕç. Май пуçламăшĕнче видеосалонсенче, библиотекăсенче илемлĕ фильмсем кăтартассине йĕркелĕç, Аслă вăрçă пирки тĕплĕнрех пĕлме май парĕç.
Çĕнтерÿ кунне вара майăн 8-мĕшĕнчех ял тăрăхĕсенче уявлама тытăнĕç. Савăнăçлă лару-тăрура вăрçă ветеранĕсене, тăлăх салтак арăмĕсене чыслĕç. Каçхине Хĕрлĕ Чутайра Çĕнтерÿ лапамĕнче Ĕмĕрлĕх вут чĕртĕç. Çĕнтерÿ кунĕнче асра юлмалли, кăмăла çĕклемелли самант чылай. Савăнăçлă уява ял тăрăхĕсенчи вăрçă ветеранĕсене, тăлăх салтак арăмĕсене те хутшăнтарасшăн. Вĕсене район центрне ятарласа лартсах килĕç.
Ял тăрăхĕсен хушшинчи тĕп библиотекăра вара Мускаври Çĕнтерÿ парадне курса савăнĕç, «çавра сĕтеле» хутшăнĕç. Унтан вырăнта паллă уява мĕнле йĕркеленине пăхĕç. Хĕрлĕ Чутай райповĕ пухăннисене йăлана кĕнĕ йĕркепе «çар пăттипе» хăналĕ. Уяв программи чăннипех анлă, пурне те асăнса пĕтереймĕн. Тĕп тĕллевĕ - Аслă çĕнтерÿ кунне тивĕçлипе паллă тăвасси, кашнин чун-чĕринче ырă та тарăн йĕр хăварасси.