05 мая 2010 г.
Вăрмар районĕнчи Пысăк Енккасси ял тăрăхĕн пуçлăхĕ А.Смирнов вырăнти çул-йĕре йĕркене кĕртме республика бюджетĕнчен самай пысăк укçа уйăрассине пĕлсен чăннипех савăннă. Чăн та, вак чул сарса хытарнă çул-йĕр çак вăхăт тĕлне палăрмаллах юхăнма ĕлкĕрнĕ. Вырăн-вырăнпа путсах кайнă. 2008 çулхи сентябрьте пуçлăх çак ĕçе ирттерме конкурс йĕркеленине пĕлтернĕ. Вырăнти çул-йĕре йĕркене кĕртме «Ямал» тулли мар яваплă пĕрлешÿпе «Сергеев В.М» хресчен «фермер» хуçалăхĕ кăмăл тунă. Конкурса тăратнă заявкăсене пăхса тухнă хыççăн ял тăрăхĕ çак ĕçе фермер хуçалăхне шанса панă, унпа контракт тунă. Анчах кун хыççăн кун иртнĕ, фермер ĕçе тытăнма васкаман. Кĕрхи уй-хир ĕçĕсенчен ниепле хăпайман вăл. Ĕнтĕ таврана шурă юр та ÿккелеме пуçланă, лав вырăнтан тапранман.
- Контракта пăрахăçлатăп, çул-йĕр юсама налук нумай тÿлемелле, усăллă мар, - шалт тĕлĕнтернĕ юлашкинчен ял тăрăхне Сергеев.
А.Смирнов, лару-тăру çапла çаврăнса тухасса кĕтменскер, ирĕксĕрех «Ямал» хупă пĕрлешÿрен пулăшу ыйтнă. 2008 çулхи декабрĕн 19-мĕшĕнче ял тăрăхĕпе предприяти çĕнĕ килĕшÿ тунă. Ун тăрăх пĕрлешĕвĕн вак чулпа сарса хытарнă çула «25 километр» юсаса çĕнетмелле пулнă. Çак ĕç-хĕлшĕн республика бюджетĕнчен 444500 тенкĕ тÿлессине аван пĕлнĕ вĕсем. Çавăнпа вăхăта сая ямасăр ĕçе пикеннĕ. Шел, çут çанталăк тĕллеве пурнăçлама паман. Хĕл хĕлех çав, строительсем тăрăшса вăй хунине пăхмасăр çула шурă юрпа хупланă. Ирĕксĕрех юсав ĕçĕсене чарса лартма тивнĕ.
Ĕнтĕ Смирновăн та тутлăн тĕлĕресси пăчланнă. Республика бюджетĕнчен уйăракан укçа-тенкĕпе туллин усă курманшăн çÿлтен пуçран ачашласа шăлманнине аван ăнланнă вăл. Ял çыннисен куçĕ умĕнче ятне-сумне ярасси килменни те шухăшлаттарнă. Хайхи каллех «Ямал» предприяти директорĕнчен Л.Ивановаран пулăшу ыйтнă. Икĕ пуçлăх çине тăрсах ĕçе туллин пурнăçланине, палăртнă участокра çула юсаса çĕнетнине çирĕплетекен документсем хатĕрленĕ. Строительсен тăрăшулăхне шăп та шай 444500 тенкĕлĕх хакланă. Унтан хайхи документсене Вăрмар район администрацийĕн строительство, обществăлла инфраструктурăна аталантаракан пая çитерсе панă. Шел, район администрацийĕнче пушă сăмахсемпе суя документсене хăвăрт ĕненнĕ. Пĕр турткаланмасăр асăннă укçана «Ямал» пĕрлешĕве куçарса панă. Чиновниксем вырăна кайса пăхас пулсан шухăш-кăмăлĕ улшăннă пулĕччĕ-и; Тен, вĕсен те çÿлте ларакансене республика бюджетĕнчен уйăракан укçапа туллин, тĕллевлĕн усă курнине хăвăртрах пĕлтерес килнĕ; Пушă вĕçĕ Пысăк Енккасси ял тăрăхĕн пуçлăхне кăна-и, хăйсене те вирлĕн пырса лектерессе аван пĕлнĕ çав.
Ыттисене улталаса ырă ят илме хăтланни А.Смирнова суд умне тăратнă. Тÿресем ăна 7 пин тенкĕ штраф панă.