18 февраля 2010 г.
Каç енне Муркашри «Мечта» лавккана вăтам пÿллĕ арçын кĕрсе тăнă. Тулли сентресем çинчен тавар суйласа илнĕ хыççăн касса енне хăюллăн таплаттарнă. Унтан кĕсйинчен пĕр пин тенкĕлĕх хут укçа кăларса сутуçа тыттарнă. Лешĕ ăна-кăна тавçăрса иличчен арçыннăн шăрши-марши те юлман. Вăл çиçĕмле хăвăртлăхпа тухса шăвăнни лавккара ĕçлекене самай тĕлĕнтернĕ. Ырă мара сиссе хут укçана тĕплĕнрех тинкерсе пăхнă та чутах каялла кайса ларман. Клиент ăна суя укçа тыттарса хăварнă-мĕн. Шалти ĕçсен пайне çийĕнчех пĕлтерни ултавçа тытса чарма пулăшнă. Ун пирки уголовнăй ĕç пуçарнă ĕнтĕ. Миндеров «ятне улăштарнă» тата миçе çынна ниме тăман хут тыттарса хăварнă-ши; Шанма шан та, тĕрĕсле теççĕ çав.
Çиччĕ виçмесĕр ан кас
Ĕçри инкек-синкек миçе çыннăн пурнăçне татмасть-тăр. Вăхăтсăр вилекенсем _ час-часах çамрăксемпе вăй питтисем. Анчахрах Канашри «Спецмонтажстрой» фирмăри хăрушă инкеке пула 28 çулти газосварщикăн пурнăçĕ татăлнă. Сăлтавĕ _ хăрушсăрлăх правилине пăхăнманни. Çак кун çамрăк ăшă системин хуранне йĕркене кĕртнĕ. Ĕçре кислород тултарнă газорезкăпа усă курнă. Хуранти пăс пусăмĕ хăпарнипе тимĕр пăрăх çурăлса кайнă, газорезчик çине ÿкнĕ. Арçын пăрăнса-тарса ĕлкĕреймен, йывăр аманнипе çавăнтах вилнĕ. Хăрушсăрлăх йĕркине пăхăнманни ытла хакла ларнă.
Вĕри кăмака нуши
Шартлама сивĕре кăмакана виçесĕр хутни те час-часах синкерпе вĕçленет. Çак тапхăрта мĕн чухлĕ мунча вут-çулăмра кĕлленнине шутласа та кăлараймăн. Çулăм пурлăха тĕп тунипе пĕрлех хуçине те сиенлет. Канаш районĕнчи Ушанарти 37 çулти хĕрарăм сых ятне шартлатса çунакан кăмака умĕнчен хăпман темелле. Асăрханайман, питне, мăйне пĕçертсе янă, ăна район больницине сипленме ăсатнă.
Асăрханăр, наркăмăшлă спирт!
Чăваш Енре юлашки вăхăтра хальлĕхе тупса палăртман спиртпа наркăмăшланасси сасартăк ÿссе кайнă. Акă анчахрах Шупашкарти «Васкавлă медицина пулăшăвĕн больницине» унпа аптранă çынна илсе пынă. Вилме патнех çитнĕ вăл. Çийĕнчех пулăшу парса çăлса хăварнах ăна. 21 çулти çамрăк та наркăмăшлă спирта пулах больницăна лекнĕ.