27 января 2010 г.
1941–1945 çулсенчи Аслă вăрçăра çĕнтернĕренпе кĕçех 65 çул çитет. Ăна тивĕçлипе кĕтсе илессишĕн Чăваш Республикин ветерансен канашĕ мĕнле ĕçлет-ха? Çак кирлĕ ыйту обществăллă организацин черетлĕ пленумĕнче Канаш председателĕ А.Ф.Филиппов тунă докладра тата тухса калаçнă юлташсен сăмахĕнче тĕп вырăнта пулчĕ. Пленум çакна палăртрĕ: ветерансен организацийĕсем çине тăнипе вăрçа хутшăннă çынсене пурнăç шайне иртнĕ тапхăрта палăрмаллах лайăхлатма май пачĕ. 2010 çулхи январьтен патшалăх аслă ăрури пенсионерсене татах та ытларах пулăшĕ. Вăрçă участникĕсемпе инваличĕсен сывлăхне сиплес тĕллевпе Шупашкарта госпиталь аван ĕçлет. Аслă Çĕнтерÿ кунĕ умĕн унăн иккĕмĕш корпусĕ хута каймалла. Унта 150 койка-вырăн пулĕ. ЧР сывлăх тата социаллă аталану министерствин «Вега» реабилитаци центрĕ те ырă сăмаха тивĕç.
Аслă Çĕнтерÿ 65 çул тултарнине кĕтсе илес ĕç-хĕлти çитĕнÿсем пирки мар, ытларах çитменлĕхсем çинчен çивĕч калаçу пулчĕ пленумра. Вăрçă ветеранĕсене тÿлевсĕр эмелсемпе тивĕçтересси – паянхи çивĕч ыйту. Аптекăсенче час-часах çук тенине илтетĕн. Çавна пула çăмăллăхçăсен 85 проценчĕ социаллă пакетсенчен писнĕ. Вут-çулăм витĕр тухнă чылай ветеранăн хваттер условийĕсене лайăхлатмалла. Ялсенче пурăнакан вăрçă участникĕсен çурчĕсем кивелнĕ... Раççей Президенчĕ Д.А.Медведев тата правительство вăрçа хутшăннă ватăсене 2010 çулта хăтлă хваттерсемпе тивĕçтерме йышăннă. Вырăнти власть органĕсем çав йышăнăва пурнăçлаччăр тесе ветерансен организацийĕсен те çине тăмалла. Шутлани хут çинче ан юлтăрччĕ.
Аслă Çĕнтерÿре тыл ĕçченĕсен тÿпи те çав тери пысăк. Фронт валли вĕсем мĕн кирлине пĕтĕмпех хатĕрлесе панă, шел те, çакна халĕ те шута илмен. Фронтовиксене панă çăмăллăхсене вĕсем те тивĕçлине палăртрĕç пленумра.
Пленумра çамрăксене çарпа патриотизм воспитанийĕ парассине вăйлатмалли пирки те калаçрĕç.
Республикăра паян вăрçă ветеранĕсем 6 пин çынна яхăн, тыл ĕçченĕсем – 45837 çын. Вĕсен социаллă тата право интересĕсене хÿтĕлесси ветерансен канашĕн ĕçĕ-хĕлĕнче малашне те тĕп вырăнта пулĕ.
А.Михайлов,
ЧР Ветерансен канашĕн пресс-службин ертÿçи.