02 декабря 2009 г.
Çак кунсенче Шупашкарти ачасемпе çамрăксен пултарулăх керменĕнче «Чăваш Республикин хĕрарăмсен канашĕ» общество организацийĕн XV съезчĕ иртнĕ. Унта 257 делегат хутшăннă.
Организаци ертÿçи С.Тимофеева хăйĕн докладĕнче паянхи хĕрарăм çемье тыткăчипе ача амăшĕ кăна маррине, вăл общество ĕçне те хастар хутшăннине палăртнă. Хĕрарăмсен канашĕн тытăмĕнче республикипе халĕ - 10 пин ытла хĕрарăм.
Съезда ЧР Президенчĕ çумĕнчи ача правипе ĕçлекен уполномоченнăй А.Андреев, «Единая Россия» партин регион политканашĕн секретарĕ В.Мидуков хутшăннă.
Доклада сÿтсе явнă хыççăн форум организацин малашлăх тĕллевĕсене палăртнă, Хĕрарăмсен республикăри канашĕн председателĕн ĕçне ЧР Патшалăх Канашĕн комитет председательне О.Зайцевăна шанса панă.
Съезд делегачĕсене çавăн пекех ЧР Президенчĕ Н.Федоров, РФ Патшалăх Думин çĕршывсен хушшинчи ĕçсен комитечĕн председателĕ К.Косачев, Раççей ача-пăча фончĕн Чăваш Республикинчи уйрăмĕн председателĕ Ю.Кислов саламланă.
Хĕрарăмсен канашне ултă çул ертсе пынă С.Тимофеевăна ЧР Президенчĕ Н.Федоров Раççей Хĕрарăмсен канашĕн асăнмалăх медалĕпе чысланă.
Форум вĕçĕнче Николай Федоров «Ачалăхшăн, ачалăх ячĕпе» ыр кăмăллăх марафонĕ уçăлни çинчен пĕлтернĕ. Республика пуçлăхĕ тата К.Косачев марафон счечĕ çине хăйсен уйăхри шалăвне хурасси пирки каланă. Марафонăн тĕп тĕллевĕ - çамрăк талантсене пулăшасси, сусăр ачасене, ашшĕ-амăшĕн асăрхавĕсĕр юлнă тăлăхсене тĕрлĕ эмелпе тивĕçтересси, ыр кăмăллăх программисем йĕркелесси.
Акционерсен «Волга-телеком» уçă пĕрлĕхĕ пĕлтернĕ тăрăх, кăçал ыр кăмăллăх акцине граждансем килĕнчен тухмасăрах хутшăнма пултараççĕ. Килти телефонран талăкĕпех ĕçлекен нумай каналлă «Волга-Телекомăн» сервис номерĕпе - 8-809-707-69-19 - çеç шăнкăравламалла. Çапла вара абонент Ача-пăча фондне 30 тенкĕ хывнă шутланать.
В.Петрова.