20 ноября 2009 г.
Ноябрĕн 18-19-мĕшĕсенче Чăваш Енре Раççей Федерацийĕн субъекчĕсенчи вĕрентĕве ертсе пыракан пуçлăхсен канашлăвĕ иртрĕ. Унта «Вĕрентÿ тытăмĕн 2010 çулхи тĕп тĕллевĕсем» ыйтăва сÿтсе яврĕç.
РФ вĕрентÿпе наука министрĕ А.Фурсенко тата ЧР Президенчĕ Н.Федоров ĕнер канашлăвăн пĕрлехи ларăвне хутшăнчĕç. Хăйĕн докладĕнче А.Фурсенко Чăваш Ен çĕршывра вĕрентÿ енĕпе яланах малта пулнине палăртрĕ. «Ахальтен-и вĕрентĕвĕн чи çивĕч ыйтăвĕсене сирĕн республикăра сÿтсе яватпăр;! Регионсен опычĕ усăллă тата питĕ интереслĕ», _ терĕ министр. ЧР Президенчĕ Чăваш Енри вĕрентÿ тытăмне мĕнле модернизациленипе паллаштарчĕ, çак сферăна малалла аталантармалли çул-йĕре палăртрĕ.
«Эпир хамăр опытпа паллаштаратпăр, ыттисенчен те вĕренетпĕр. Чăваш халăх сăмахлăхĕнче çакăн пек калани пур: «Кашни ĕçĕн хăйĕн кĕвви». Малта пыракансен кĕввине вĕренни питĕ усăллă тесе шутлатăп», _ терĕ республика пуçлăхĕ.
А. Фурсенкăпа Н.Федоров электромеханика колледжĕн ĕçĕ-хĕлĕпе те паллашрĕç, классемпе лабораторисене çитсе курчĕç. Вĕренекенсен тата педагогсен инноваци ĕçĕсемпе интересленчĕç. Сăмах май каласан, колледж «Вĕрентÿ» наци проекчĕпе килĕшÿллĕн пуçламăш тата вăтам професси вĕрентĕвĕн учрежденийĕсен хушшинче ирттернĕ конкурс çĕнтерÿçи. Раççей министрĕпе Чăваш Ен Президенчĕ çавăн пекех И.Н.Ульянов ячĕллĕ Чăваш патшалăх университечĕн профессорĕсемпе тата преподавателĕсемпе тĕл пулчĕç, çĕршывăн социаллă пурнăçпа экономикинче аслă шкулпа наука мĕнле вырăн йышăнни пирки калаçу ирттерчĕç. Хастар та пултаруллă çамрăксене РФ наградисене пачĕç. Шупашкарти 5-мĕш гимназири тĕл пулура та ĕçлĕ калаçу пычĕ.
Е.АТАМАНОВА.