20 ноября 2009 г.
Чăваш ял хуçалăх академийĕнче ырă йăла пур: студентсем тăтăшах тĕрлĕ район ертÿçисемпе, ĕçченĕсемпе тĕл пулса калаçаççĕ. Тĕрĕсрех каласан, республикăри ентешлĕхсен ĕçне хутшăнакансем хăйсен тăрăхĕнче çуралса ÿснĕ çамрăксем патне тĕл пулăва килеççĕ. Хальхинче Канашсем курнăçса калаçрĕç. Аслă шкул хыççăн яшсемпе хĕрсене тăван тăрăх кĕтни пирки сăмах пычĕ. Унта асăннă районти хуçалăхсен, предприятипе организацисен ертÿçисем, студентсемпе преподавательсем хутшăнчĕç.
Район администрацийĕн пуçлăхĕ В.Софронов район кун-çулĕпе паллаштарнă май чуна пăшăрхантаракан ыйтусене те хускатрĕ. Сăмахран, сухаламан çĕрсен лаптăкĕсем пур, вĕсене 2012 çулччен пĕтĕмпех ĕçе кĕртесшĕн. Çав вăхăтрах çамрăксем яла юлманни те чăрмав кÿрет. Çавăнпа та асăннă аслă шкулăн 4-5 курс студенчĕсене тăван района экскурсие илсе каясшăн вăл, хуçалăхсен ĕçĕ-хĕлĕпе паллаштарасшăн. Кăмăл пуррисене ĕçе вырнаçтарма та пулăшĕç. Çавăн пекех Владислав Васильевич çамрăксене диплом илнĕ хыççăн тăван тăрăха таврăнма йыхравларĕ, çурт-йĕрпе пулăшма та шантарчĕ. Çамрăк çемьесем ятарлă программăсемпе усă курса ялсенче йăва çавăрнине каларĕ. «Шăхасанта нумаях пулмасть вун икĕ хваттерлĕ çурт хута ятăмăр. Ятарлă программăпа 400 пин тавăрса памалла мар субсидисем илчĕç ĕçченсем, ыттине _ кредит. Ăна та чылайăшĕ амăшĕн капиталĕпе татса пĕтерчĕ», _ терĕ В.Софронов.
Киров ячĕллĕ хуçалăхра выльăх пăхакансем, дояркăсем, ытти ĕçченсем çитменнине палăртрĕ Н.Андреев ертÿçĕ. «Ял ватăлать, _ терĕ вăл пăшăрханса. _ Çамрăксем Мускава тухса каяççĕ те каялла таврăнмаççĕ. Сире вара Канаш районĕнче тĕпленме сĕнетĕп. Çĕр-анне _ тăрантаракан. Çавăнпа та вĕреннĕ вăхăтрах ĕç пирки шухăшламалла».
«Канаш Ен» ентешлĕхĕн ертÿçин çумĕ Ю.Алексеев ялăн пуласлăхĕ пуррине çирĕплетрĕ. «Кунта социаллă пурнăç сферине аталантарас тесе чылай тăрăшаççĕ: килсерен газ çунать, çул-йĕр тăваççĕ, садиксемпе шкулсем хута каяççĕ, _ пĕлтерчĕ вăл. _ Кризис вăхăтĕнче заводсем хупăнаççĕ, çĕр ĕçĕ вара хăть хăçан та пĕлтерĕшлĕ».
Ю.Алексеев çамрăксене ентешлĕх ĕçне хутшăнма чĕнсе каларĕ. Студентсем хушшинче хăйсен ушкăнне йĕркелеме сĕнчĕ.
«Çĕр пек ырă япала çук, _ терĕ «Канаш Ен» ентешлĕх ертÿçи А.Кипеч çамрăксене вĕрентсе. _ Кам ăна юратать _ вăл выçă лармасть. Чăвашсен мĕн авалтан çĕр хисепре пулнă. Вăл пире нихăçан та кÿрентермест».
Ентешлĕх ĕçне хастар хутшăннăшăн Анатолий Ильич Чăваш патшалăх ял хуçалăх академийĕн агробизнеспа технологи кафедрин ертÿçине К.Захарова Тав хучĕ парса чысларĕ.
Çамрăксене тăван тăрăха йыхравлакансем чылаййăн пулчĕç тĕл пулура. Çуралса ÿснĕ вырăнта вĕсем кирлĕрех пулнине, патшалăх умĕнчи парăма ĕçлесе татмаллине каларĕç. «Яла суйласа илекенсене çутă малашлăх кĕтет», _ терĕç яшсемпе хĕрсене ырă сунса.