11 ноября 2009 г.
Çĕрпÿ районĕнчи «Водолей» пĕчĕк яваплă пĕрлĕхе йĕркелесе яни кăçал тăваттăмĕш çула кайнă. «Бульдеевский» ял хуçалăх производство кооперативĕ пулнă малтан кунта. В.Н.Петров ертÿçĕ çамрăк пулин те саланса кайнă, юхăннă хуçалăха ура ярса пусма хăраман. Ĕçе юратни, чăн-чăн çĕр хуçи пулас тениех илсе çитернĕ пулмалла ăна кунта. Асăннă районти Тимĕрчкасси ялĕнче çуралса ÿснĕ вăл. 1996 çулта И.Н.Ульянов ячĕллĕ Чăваш патшалăх университетĕнчи машиностроени факультетне пĕтернĕскер малтан предпринимательте ĕçленĕ. Ырлăх çÿлтен тăкăнманнине лайăх пĕлет Владимир Николаевич. Ирхи кайăкпа вăранса ĕçе кÿлĕнме хăнăхнăскер пурнăçра теветкел те çаврăнăçуллă. Çĕрпÿре лавккасем те тытать.
_ Çĕрпÿ районĕпе илес пулсан чи япăх çĕр Çырмапуç тăрăхĕнче. Çумăр çуса кайсан урам тăрăх тăм çăрăлса, çĕпре пек юхса выртать. Çавăнпа та пирĕн уйсемпе хирсенче пахча çимĕçпе ытти культура туса илме питĕ йывăр. Ирĕксĕрех тулăхлатассипе çине тăрса ĕçлеме тивет, _ тет ертÿçĕ.
Паянхи кун «Водолей» пĕрлĕх аталанса, вăй илсе пыракансен шутĕнче. Кунта тыр-пул ÿстереççĕ, выльăх-чĕрлĕх çитĕнтереççĕ. Хуçалăхăн 2000 гектар çĕр, вĕсенчен 1200 гектарне тыр-пул йышăнать. 400 гектар çинче _ нумай çул ÿсекен курăксем. Тепĕр 400 гектарĕ çине кĕрхи культура акса хăварнă. «Путь Ильича» хуçалăхăн усă курман 150 гектар çĕрне те пушă вырттармаççĕ.
«Водолей» пĕрлĕхре 75-ĕн вăй хураççĕ. Биржа урлă вырнаçнисем те пур. Специалистсем çителĕклĕ, хăйсен ĕçне йĕркеллĕ туса пыраççĕ.
Пĕчĕк яваплă пĕрлĕхĕн пĕтĕмĕшле тăватă ферма, вĕсенчен пĕринче _ кроликсем. Вăрăм хăлхаллисем 300 яхăн халь. Пысăк çитĕннĕрен ытларах шурă тата сăрă великан ăратсене ĕрчетме тăрăшаççĕ. Кролик какайĕ деликатес пулнă май хакĕ пасарта йÿнех мар, çавăнпа та вĕсене ытларах чĕрĕлле сутаççĕ. Пĕчĕкреххисене ятарлă комбикорм, çитĕннисене вара тырă, утă çитереççĕ.
Пĕтĕмĕшле илсен выльăх шучĕ те пĕчĕк мар: 330 пуç шултра мăйракаллă выльăх, сысна 400 пуç ытла. Сăвакан ĕнесене лейкозран сыватнă кăçал. Иккĕмĕш хут панă юн анализĕ те ĕне выльăх чирлĕ маррине çирĕплетнĕ.
Техника енчен илес пулсан, пуян тесе калас килет çак пĕрлĕхе. Лизингпа тата кредитпа икĕ трактор туяннă, унсăр пуçне хуçалăхра виçĕ комбайн, пилĕк самосвал, икĕ уазик, нимĕç косилки, выльăх апачĕ пуçтарса хатĕрлемелли нимĕç комбайнĕ, ĕçе çăмăллатма, хăвăртлатма пулăшакан тата ытти темĕн тĕрлĕ агрегат.
_ Ĕçлемешкĕн пирĕн йăлтах пур. Хăвăрах куратăр, техника çĕнĕ пирĕн. Тырă-пулне те начар мар туса илетпĕр. Çапах та ял хуçалăхĕ паянхи куна йывăррăн, аран-аран пурăнкалать. Ĕçлетĕн, май пур таран талпăнатăн малалла _ кăтартăвĕ çук. Тĕш тырă хакĕ тĕлĕнмелле пĕчĕк. Тĕслĕхрен, пиллĕкмĕш класлă тулă _ 2 тенкĕ те 80 пус, урпа _ 2 тенкĕ те 50 пус. Йÿнĕ пулсан та сутăнмасть-ха. Çунтармалли-сĕрмелли материал, удобрени, электроэнерги хакĕ вара хăпарсах пырать. Юрать-ха какай хакĕ тытăнса тăрать, сĕт те кăшт хăпарчĕ, 1 литрĕ _ 8 тенкĕ, _ пĕлтерет Владимир Николаевич.
Кăçал çĕр улмине 8 гектар çинчен пуçтарса илнĕ. Çитес çултан «иккĕмĕш çăкăра» 12 гектар çинче çитĕнтересшĕн. Çĕр улми ани çине навус та тăкса хăварнă. «Тепĕр çул кăшман, кишĕр те лартса пăхасшăн-ха. Вĕсем пурпĕрех лайăх сутăнаççĕ, хакĕ те пур», _ ĕмĕт-тĕллевĕпе паллаштарчĕ ертÿçĕ.
Пахча çимĕç, тыр-пул хакĕ йÿнĕ пулин те В.Петров çак лару-тăруран тухмалли çул тупассăн туйăнать. Çĕр ĕçне аван пĕлет, чи кирли - тăван тăрăха, çут çанталăка юратать. Мал ĕмĕтлĕ Владимир Николаевич паянхи çăмăл мар лару-тăрура та пĕрлĕхе ăнăçлă ертсе пыма, йывăрлăхсене çĕнтерсе ăна аталантарма вăй çитерет. «Водолей» пек пĕчĕк яваплă пĕрлĕхсем малашне те ÿсĕм çулĕпе çирĕппĕн утасса шанас килет.
Е. Атаманова.