03 ноября 2009 г.
2009 çулхи октябрĕн 3-мĕшĕнче 29 çулти çамрăк арçын арăмĕпе пĕрле хунямăшĕн çуралнă кунне паллă тума кайнă. Уявра кĕрÿшĕпе 70 çулти хуняшшĕ хушшинче хирĕçÿ сиксе тухнă. Ватăскер çав териех мĕн каласа кÿрентерме пултарнă-ши? Темиçе хутчен те судлашнă арçын хуняшшĕне арăмĕпе хунямăшĕ умĕнчех темиçе хутчен пуçĕнчен пуканпа çапнă. Хĕрарăмсем ăна чарма пултарайман. Йывăр сурансене пула пенсионер васкавлă медицина пулăшăвĕн больницинче тăна кĕмесĕрех вилсе кайнă.
Çамрăк арçын тинтерех кăна тĕрмерен тухнă «çур çул та иртмен-ха». Халĕ çĕнĕрен суд тенкелĕ çине ларма тивĕ.
Прокуратура çумĕнчи следстви комитечĕн Шупашкарти районсен пĕрлехи следстви пайĕ преступлени паллисем тăрăх РФ УК 111-мĕш статйин 4-мĕш пайĕпе уголовнăй ĕç пуçарнă.
Юлташне вилмеллех хĕненĕ
Шупашкарти Первомайски поселокĕнче пĕр çурт путвалĕнче арçын виллине тупнă. Çав тĕлĕшпе Шупашкарти районсен пĕрлехи следстви пайĕ уголовнăй ĕç пуçарнă та ĕнтĕ.
2009 çулхи август уйăхĕнче икĕ çамрăк арçын 53 çулти паллаканĕ патне пынă. Виççĕшĕ час-часах пĕрле хăналанма юратнă-ха. Хальхинче те пĕр пулăштух пушатнă. Çитмен курăнать, эрех пĕтнĕ хыççăн арçын çамрăксенчен 80 тенкĕ илнĕ те аншарли туянма вĕçтернĕ. Кăштахран тайкалана-тайкалана пĕр пуссăр, эрехсĕр таврăннă, хăнисене вара укçана çухатрăм тесе суйнă.
Урса кайнăскерсем хваттер хуçине тапа-тапа хĕнеме тытăннă. Арçын улталани килĕшмен имĕш. Нумаях та вăхăт иртмен _ йывăр сурансене пула лешĕ вилсе кайнă. Преступлени йĕрне пытарас тесе юлташĕсем арçын кĕлеткине путвала пăрахнă. Тепĕр икĕ эрнерен хваттер хуçине çурта виле шăрши сарăлнă тăрăх тупнă.
Е.Башкирова.
Çил хăвалакансем
Çуран çÿрекеншĕн çул урлă каçма чĕр нуша паян. Водительсем светофор умĕнче чарăнкалаççĕ-ха, анчах çуран каçмалли ятарлă вырăнсене пач асăрхамаççĕ тейĕн, çил пек ĕрĕхтерсе иртсе каяççĕ. Çил хăвалама юратни час-часах инкек-синкекпе вĕçленет. Кăçалхи май уйăхĕнче Шупашкарти Андрей Назаров Мир проспекчĕпе çине тăрсах çăмăл машинине хăваланă. Çамрăк арçын «зебра» урлă каçакан ватă хĕрарăма ытла кая юлса асăрханă. Вирхĕнсе пыракан «хурçă урхамахне» чарса ĕлкĕреймен, кинемее пырса çапнă. Йывăр суранланнă хĕрарăма пульницана ăсатнă. Çул-йĕр йĕркине пăхăнманни Назарова суд тенкелĕ çине лартнă. Тÿресем ăна тĕрĕслев вăхăчĕпе условнăй майпа пĕр çулталăклăх айăпланă. Çак вăхăтра руль умне те лараймĕ.
Л.АЛА.