03 ноября 2009 г.
«Максимол» тулли мар яваплă пĕрлешÿн генеральнăй директорĕ «ЮниМилк - Чебоксары» предприятин филиалĕнчен ултавлă майпа сĕт юр-варне икĕ миллион тенкĕлĕх çаратнă.
Вăрмар районĕнчи Шăхальти А.Пашков «Максимол» пĕрлешĕвĕн ертÿçинче нумай та вăй хуман темелле, анчах кĕске хушăрах вун-вун çынна чике тăршшĕ лартма ĕлкĕрнĕ. Хайхискер А.Андреев тата Д.Морозов çине регистрациленĕ «Фирма Жемчуг», «Молочная речка» пĕрлешÿсен реквизичĕпе хăйне пĕлнĕ пек усă курма тытăннă. Вĕсен хуçисене систермесĕр-пĕлтермесĕр «ЮниМилк» пĕрлешÿпе килĕшÿ тунă. «Фирма Жемчуг», «Молочная речка» ячĕсемпе витĕнсе хайхи паллă та пысăк предприятирен сĕт юр-варне икĕ миллион тенкĕлĕх илсе тухнă. Пуçлăхсем япшар чĕлхеллĕ арçынна шаннă, ĕненнĕ çав. Пĕр иккĕленмесĕр хаклă тавара тыттарса янă.
Самай хĕпĕртенĕ Пашков сĕт продукцине республикăри суту-илÿ вырăнĕсенче ярăнтарнă. Сутса тунă укçана, 974 пин тенке, «Молочная речка» тата «Фирма Жемчуг» пĕрлешÿсен расчет счечĕ çине çитсенех Пашков «Максимола» куçарттарнă. Хăйĕн хура ĕçĕ, ултавĕ çиеле тухасран шутсăр асăрханнă пулас. Кассăра укçа нумай выртман. Пуçлăх ĕç çыннисене шалу памалла текелесе кĕçех тупăша йăлтах пĕтĕрсе чикнĕ. Янтă укçапа хăйне валли 200 пин тенкĕ тăракан çăмăл машина та илме манман.
Пăшатана темле пытарсан та михĕрен шăтарса тухнах. А.Пашкова хулăн кĕсйи те суд тенкелĕ çинчен хăтарайман. Ăна 3 çул та 6 уйăха ирĕкрен хăтарма, тăкака саплаштарма йышăннă. Çапла вăл ытлашши хапсăнсан.
Алла алă çăвать
«Чувашупрдор» «ЧР автомобиль çулĕсен управленийĕ» патшалăх учрежденийĕн директорне саккассене вырнаçтарассипе саккуна пăснăшăн административлă явап тыттарнă.
Шупашкар хулинчи Ленин район прокуратури Монополистсемпе кĕрешес ĕçĕн федераци службин «Чăваш Республикинчи автомобиль çулĕсем» патшалăх учрежденине тĕрĕслевпе çитни ахальтен мар. Алла алă çăвать тенĕн кунта та çак йĕркепе ĕçлеме тăрăшни тĕрĕслевçĕсен хăлхине тахçанах кĕнĕ. Тата вăрман кăна хăлхаллă-им; Сас-хура чăна килнĕ. В.Атрохов директор патшалăх тата муниципалитет нушишĕн пулăшу парассипе, тавар кÿрессипе, ытти ĕçе пурнăçлассипе саккассене вырнаçтарас саккуна пăхăнсах кайман. Хăйне тĕрĕслессе шутламан-кĕтмен-тĕр вăл. Район прокуратури саккун урлă сиксе каçма хăтланнă пуçлăха административлă явап тыттарма ĕç пуçарнă. Атрохов айăпне палăртса монополилĕхпе кĕрешекен орган ăна 1064 тенкĕ штраф панă.