30 октября 2009 г.
Ачаранах пĕрремĕш ушкăн инвалидне Тимофеева Анастасия Юрьевнăна реабилитацилемелли техника хатĕрĕсен хакĕн компенсацине тÿлеменни çинчен Шомикри психоневрологи интерначĕ Шупашкарти Ленин районĕн прокуратурине заявлени тăратнă. Çавна май асăннă прокуратура тĕрĕслев ирттернĕ.
Инвалидсене реабилитацилес ятарлă программа тăрăх А.Ю.Тимофеевăна кашни уйăхра 60 памперспа тата нÿрĕк çăтакан 30 простыньпе, пеленкăпа тивĕçтермелле.
Саккунпа инвалидсене реабилитацилемелли техника хатĕрĕсемпе тивĕçтересси федераци бюджечĕн укçи-тенкинчен пулса пырать. Çавна май тĕллеве пурнăçлама Раççей Федерацийĕн Социаллă страховани фончĕн Чăваш Республикинчи регион уйрăмне _ патшалăх учрежденине параççĕ.
А.Ю.Тимофеевăна реабилитацилемелли техника хатĕрĕсемпе тивĕçтересси çинчен калакан заявление Раççей Федерацийĕн Социаллă страховани фончĕн Чăваш Республикинчи регион уйрăмне 2008 çулхи ноябрĕн 28-мĕшĕнче çитернĕ. Анчах та 2009 çулхи январь, февраль, март уйăхĕсенче А.Ю.Тимофеевăна çÿлерех асăннă хатĕрсемпе тивĕçтермен.
Инвалид интересĕсене хÿтĕлесе район прокурорĕ Шупашкарти Ленин районĕн судне реабилитацилемелли техника хатĕрĕсен хакĕн компенсацине шыраса илесси çинчен калакан тавăç тăратнă. Суд йышăнăвĕ тăрăх прокурор ыйтăвне тивĕçтернĕ, ĕçлеме пултарайман А.Ю.Тимофеевăна 3706 тенкĕ те 20 пус компенсаци укçан тавăрса памалла тунă.
Л.БУСОВА, Шупашкар хулин Ленин районĕнчи прокурорăн аслă пулăшуçи.