21 октября 2009 г.
Шупашкарти Трактор тăвакансен культура керменĕн сцени çинче шкул шăнкăравне шăнкăртаттарса чăваш тумĕ тăхăннă хĕр çаврăнать. Çук, урока чĕннине сăнлакан ÿкерчĕк мар ку - çапла хитре те илĕртÿллĕ пуçланчĕ Çĕр ĕçченĕн çулталăкне халалланă «Чĕре кĕввисем» телетĕпел... Çапах та мĕншĕн шăнкăрав; Мĕншĕн тесен савăнăçлă каçа ялти педагогика ĕçченĕсем пухăннă. Республикăри вĕрентекенсем хатĕрлекен заведенисем, районсенчи учительсем хăйсен ĕçĕ-хĕлĕпе, опычĕпе паллаштарчĕç уявра. Ку енĕпе илсен çитĕнÿсемпе республика чăннипех мухтанма пултарать. Шкулсем çĕнелнĕçем çĕнелсе пыраççĕ. Паянхи кун ыйтăвне тивĕçтерекен шай Раççейре ку енĕпе 60 процент пулсан, Чăваш Енре 80 процентран иртнĕ. Компьютер класĕ, интернет, çĕнĕ технологи, çавăн пекех кашни ялта газ, асфальтлă çул пурри - пурте вĕрентÿпе воспитани ĕçне ăнăçлă туса пыма пулăшнине палăртрĕç телетĕпелте. Çак çитĕнÿсенче, паллах, Чăваш Республикин Президенчĕн Н.Федоровăн тÿпи те пысăк.
Еплерех вĕреннĕ-ши шкулта республикăн пулас пуçлăхĕ;
- Класра икĕ Николай Федоровччĕ. Çавăнпа пĕрне - Пĕрремĕш Николай, теприне - Иккĕмĕш Николай тесе чĕнеттĕмĕр. Пĕрремĕш Николай пирĕн паянхи президентчĕ. Пĕрремĕш ята вăл чăннипех те çирĕплетсе пыратчĕ. Нумай вулатчĕ, пур енĕпе те ырă тĕслĕх кăтартатчĕ... - терĕ Шупашкар районĕнчи Толик Хураски шкулĕн директорĕ Светлана Георгиевна Колпакова, хăй вăхăтĕнче Николай Васильевич вĕреннĕ класс ертÿçинче ĕçленĕскер.
Светлана Георгиевна хăй те вĕренекенĕ пекех пултаруллă çын. Районта çеç мар, республикăри чи лайăх учительсенчен пĕри. Вăл ертсе пыракан шкул вара çĕнĕ проектсемпе инновацисем ĕçе кĕртес енĕпе палăрса тăрать.
Тăвай районĕнчен килнĕ Вера Васильевна Юркина та педуниверситет студентки чухнех палăрнă. Çерем çĕрсем уçма хутшăннăшăн ятарлă медаль илнĕ. Тивĕçлĕ канура пулсан та вĕрентÿ ĕçĕн отличникĕ ялан шкулта, ял çыннисем хушшинче. «Ачасемсĕр пурăнаймастăп, - терĕ вăл. - Вĕсемпе калаçни, ĕçлени пурăнма вăй парать». Вера Васильевна ăрăвĕн, пĕтĕм тăванĕн вĕрентÿ ĕçĕнчи стажне шутлас пулсан 500 çул та çитет. Темиçе ĕмĕр! Муркаш районĕнчи Чемей шкулĕнче 40 çул ĕçлесе пенсие тухнă Елена Прокопьевна Расторгуева вара тата та тĕлĕнтерчĕ - вĕсен династийĕн педагогикăри стажĕ... 1003 çул!
Канашри 7-мĕш ача сачĕн ертÿçин Елена Васильевна Алексеевăн та хăйсен йăхĕпе мухтанмалли пур. Асламăшĕ И.Я.Яковлева пĕлнĕ, Чĕмпĕр шкулĕнчен вĕренсе тухнă. Аслашшĕ большевиксен съездĕнче пулса Ленинпа, Сталинпа алă тытнă, сăмахĕсене чĕррĕн итленĕ. Вĕсен йăхĕнчен Совет Союзĕн Геройĕ те - Александр Беляев «Елчĕк районĕ» тухнă.
- Çакăн пек тăвансем пур чухне вĕрентÿпе воспитани ĕçĕнче япăх вăй хума совесть те çитес çук, - терĕ Е.В.Алексеева.
Тĕлĕнмеллисем татах та пулчĕç. Акă Елчĕк районĕнчи Çирĕклĕ Шăхаль шкулĕнче вĕренекен Оля Иванова, Оля Карчикова, Лариса Чернова Раççейри наука енĕпе иртекен конкурссенче çĕнтереççĕ. «Профессорсем» тесе чĕнеççĕ вĕсене тантăшĕсем. Маттур ачасене Надежда Антоновна Карчикова вĕрентет.
Çĕрпÿ районĕнчи Паваркасси шкулĕн директорĕ Василий Степанович Степанов парашютпа миçе хутчен сикнĕ тетĕр... 37 хутчен! Тата... сăвă çырать, кĕвĕ хывать, Чăваш юрăçисен репертуарĕнче унăн мĕнпурĕ 57 хайлавĕ...
Телетĕпеле хутшăннă кашни педагогах чĕрĕ чечексемпе, парнесемпе чысларĕç. Чăваш эстрада çăлтăрĕсем Иван Христофоров, Людмила Семенова, Виталий Адюков, Александр Васильев, Катя Петрова, Светлана Печникова, Типшĕм Сашук тата ыттисем вĕсен юратнă юррисене шăрантарчĕç.