04 сентября 2009 г.
Виçĕ çул каялла республикăри «Пире тĕнче уçлăхĕ йыхăрать» программăна хутшăнса Муркаш районĕнчи Калайкассинчи А.Г. Николаев ячĕллĕ вăтам шкулта çамрăк космонавтсен «Восток» клубне йĕркеленĕ. Пĕрремĕш кунран пуçласах ăна директорăн воспитани енĕпе ĕçлекен çумĕ, чăваш чĕлхипе литературине вĕрентекен Александр Марсович Степанов ертсе пырать. Отряд ĕçне 4-9 классенчи 23 вĕренекен хастар хутшăнать. 2006 çулхи пĕтĕмлетÿсем тăрăх, вĕсем республикăри конкурсра «Çамрăк космонавтсен чи лайăх отрячĕ» ята тивĕçнĕ. Пĕлтĕр «Восток» членĕ, Ольга Фомина, вăтам шкулсенче вĕренекенсем хушшинче ирттернĕ наукăпа тĕпчев ĕçĕсен республикăри «Космос» конкурсĕн «Çын тата фантастика» секцийĕнче 1-мĕш вырăн йышăннă. Унта вăл чăвашсен космос çинчен калакан мифĕсемпе поэтикине тĕпчесе хутшăннă. Вăлах кăçал Шупашкарта А.Г. Николаева халалласа ирттернĕ иккĕмĕш вулавра «Çын. Космос. Творчество» секцие хутшăнса иккĕмĕш вырăн çĕнсе илнĕ.
Отрядри Дмитрий Соколов çамрăк космонавтсен юхăмне хастар хутшăннăшăн 2008 çулта Çăлтăр хулана тата Казахстанри «Байконур» космодрома çитсе курма пултарнă.
Çамрăк космонавтсен «Восток» отрячĕн командирĕ пулнă Евгений Евдокимов _ ача-пăча организацийĕсен лидерĕсен республикăри «Манăн пуçарулăх» конкурс финалисчĕ. Вăлах гуманитари енĕпе Пĕтĕм Раççейри тĕпчев ĕçĕсен конкурсĕн лауреачĕ те. Халĕ Женя И.Я. Яковлев ячĕллĕ Чăваш педагогика университетĕнче вĕренет.
Шкул музейĕнче чи хисеплĕ экспонатсенчен пĕри _ А.Г. Николаевăн офицер карттусĕ. Музейри космос паттăрĕн пурнăçĕпе пултарулăхне кăтартакан стенд умĕнче те халăх яланах йышлă. Отряд членĕсем час-часах ушкăнпа космонавтикăпа çыхăннă вырăнсене, Шуршăлти космонавтика музейне тухса çÿреççĕ, А.Г. Николаева халалласа ирттерекен ăмăртусене, эстафетăсене хастар хутшăнаççĕ.
И. Леждей.
Сăн ÿкерчĕкре: çамрăк космонавтсен «Восток» отрячĕн ĕçне йĕркелесе пыракан А. Степанов вĕренекенсен ушкăнĕпе шкул музейĕнче.
Сăн ÿкерчĕкĕсем авторăн.