09 сентября 2009 г.
Тĕш тырă, çĕр улми уйĕсем кунран-кун пушансах пыраççĕ. Сентябрĕн 7-мĕшĕ тĕлне пĕрчĕллĕ тата пăрçа йышши культурăсене 245987 гектар «99,8 процент» çулнă, 245987 гектар çапса тĕшĕленĕ. Пÿлмене 570 пин тонна «сарă ылтăн» кĕнĕ. Гектар тухăçĕ 23,1 центнер. Комсомольски, Муркаш, Вăрмар, Шупашкар, Етĕрне, Елчĕк районĕсен кăтартăвĕсем чылай пысăкрах. Улатăр, Йĕпреç енче вара гектар пуçне 18,7-19,8 центнер кăна тухнă.
Кĕрхи культурăсене çак вăхăт тĕлне палăртнин 82,7 проценчĕ чухлĕ акнă. Елчĕк, Патăрьел, Вăрнар, Куславкка, Муркаш районĕсенче çак ĕçе вĕçленĕ ĕнтĕ. Çĕртме 57747 гектар тунă.
Республикăри хуçалăхсенче çĕр улми кăларса пуçтарасси те вăй илсе пырать. Хальлĕхе 81024 тонна кăларса тирпейленĕ. Вăрнар, Комсомольски, Муркаш, Куславкка, Элĕк, Вăрмар, Шăмăршă, Елчĕк, Тăвай районĕсенче çак ĕçе лайăх йĕркеленĕ. Республикипе гектарти вăтам тухăç 177 центнерпа танлашнă. Пахча çимĕç _ 57, хăмла 69 гектар пухса кĕртнĕ. Вăтам тухăç «гектар пуçне» _ 215 тата 10 центнер.
Утă, сенаж палăртнинчен ытларах та янтăланă. Халĕ хуçалăхсенче силос хываççĕ. Условнăй выльăх пуçне 19,6 апат единици тивет.