08 июля 2009 г.
Аста вÿсем.
Канаш районĕнчи Вăрăмпуç ялĕ çывăхĕнче Чăваш Республикин ертуçĕпе муниципалитет служащийĕн кунне паллă турĕç. Кил хуçисем - Вăрăмпуç ял тăрăхĕн пуçлăхĕ Андрей Степанов тата унăн ĕçтешĕсем тăрăшса хатĕрленнĕ уява. Вăрман хĕрринчи ахаль те хитре вырăна тата илемлетнĕ, Раççей Федерацийĕн тата Чăваш Республикин ялавĕсемпе капăрлатнă, сцена ăсталанă. Йĕри-тавра - Канаш районĕнче пурăнакан çынсен ĕçĕ-хĕлĕпе, канăвĕпе паллаштаракан стендсем. Авалтан килекен йăлапа -çăкăр-тăварпа -кĕтсе илчĕç хăнасене. Уява хутшăнакансене Канаш район администрацийĕн ертÿçи Владислав Софронов, ЧР Президент Администрацийĕн управленийĕн пуçлăхĕн çумĕ Валерий Орлов, ЧР физкультура, спорт тата туризм министрĕн çумĕ Алексей Яковлев, ЧР ял хуçалăх министрĕн çумĕ Сергей Димитриев тата ыттисем чунтан саламларĕç.
Уяв программи тĕрлĕ ăмăрту-конкурсран пуян пулчĕ. Куллен хут ĕçне туса пыракансем çава туптама, утă çулма, вутă çурма пултарнине çирĕплетрĕç. Спортра та маттур иккен вĕсем: футболла, волейболла вылярĕç, ишрĕç, чупрĕç...
Ертÿçĕпе муниципалитет служащийĕн кунĕ - ахаль спартакиада мар, сывлăхпа кану уявĕ вăл. Кашни конкурсра чи маттуррине палăртсан та выляса яракан пулмарĕÿ Пĕр ĕçре пиçĕхекен, йывăрлăхсене пĕрле парăнтарма хăнăхнă çынсен ăмăртăвĕнче туслăх çĕнтерчĕ.
И. Сергеева.