00:00 01 июня 2011 г.
Ульяновск облаçĕнче иртекен Чăваш Республикин Культура кунĕсене хутшăнакансем тата Пĕтĕм Раççейри чăваш наци уявĕн «Акатуйăн» хăнисем!
Раççейри чăвашсем йышлăн пурăнакан регионсем хушшинчи культура çыхăнăвĕсем çултан çул çирĕпленсе, вăйланса пыраççĕ. Ульяновск облаçĕнче иртекен Чăваш Республикин Культура кунĕсем тата Пĕтĕм Раççейри чăваш наци уявĕ «Акатуй» – пĕр-пĕринпе килĕшÿллĕн, туслăн хутшăнса ĕçленине çирĕплетекен ырă тĕслĕх.
Чĕмпĕр çĕрĕ чăваш культурипе искусствин тата çут ĕçĕн вун-вун паллă ĕçченне çуратса ÿстернĕ. Çак пархатарлă вырăнтах Уралпа Атăл тăрăхĕнчи вак халăхсене çутта кăларас енĕпе ырми-канми тăрăшнă, тăван халăхне çырулăх тата Çĕнĕ Халалăн Турă Çырăвĕсене парнеленĕ Иван Яковлевич Яковлев çуралса пурнăç çулĕ çине тăнă.
Çак тăватă кун илемлĕхе юратакан çынсен чĕринче чи çутă туйăмсемпе палăрса юласса, вĕсене чăваш наци культурипе историйĕн калама çук пуян еткерĕпе туллин паллашма, Ульяновск облаçĕпе Чăваш Республики хушшинчи культура ылмашăвĕсене кăна мар, чăваш çыннисем пурăнакан Раççейри пĕтĕм регион, çавăн пекех ун тулашĕнчи мĕн пур вырăн хушшинчи культура ылмашăвĕсене те анлăрах тума пулăшасса шанса тăратăп. Уяв витĕмĕ чăваш тĕнчин хастарĕсене ырă ĕçсем тума хавхалантарасси тата малашлăхра шанчăклăн туйма çĕнĕ вăй-хал парнелесси пирки те иккĕленместĕп.
Çирĕп сывлăх, çĕкленÿллĕ кăмăл-туйăм, çĕнĕ çитĕнÿсем, ырлăх тата телей сунатăп!
М.ИГНАТЬЕВ,
Чăваш Республикин Президенчĕ.