01 апреля 2011 г.
«Ачалăх ячĕпе, ачалăх-шăн» марафон пухмачĕнче халĕ 3,5 млн ытла укçа-тенкĕ.
Шупашкарти предприятисемпе организацисем çеç унăн счечĕ çине 1,5 млн тенкĕ ытла куçарнă. Нумаях пулмасть «Газпром межрегионгаз» пĕрлешÿ пухмача 166 пин тенкĕпе пуянлатнă. ЧР финанс министерствин ĕçченĕсем те сăваплă ĕçрен айккинче юлман, 19 пин тенкĕ ытла пуçтарнă. ЧР вĕренÿ министерствин ĕçченĕсем вара - 9800 тенкĕ. Хулари васкавлă пулăшу больницин коллективĕ те нимерен пăрăнман, 14 пин тенкĕ куçарнă.
Ыр кăмăллăхшăн Етĕрне, Елчĕк, Патăрьел, Канаш, Çĕмĕрле, Улатăр, Йĕпреç районĕсенче, Шупашкарпа Çĕнĕ Шупашкар хулисенче пурăнакансене уйрăмах палăртас килет.
Вăрмар район администрацийĕн пуçлăхĕ К.Никитин район çыннисене пуçарăва хутшăнма чĕнсе каланă. Вăрмарсем ниме ĕçне явăçса 145 пин тенкĕ ытла укçа пухнă.
Вĕренÿ учрежденийĕсем те хăйсен тÿпине хываççĕ. Патăрьел районĕнчи Тутар Сăкăчĕ, Сăкăт, Турхан, Шăнкăртам шкулĕсем ку енĕпе хастар ĕçлени палăрать. Ан тив, вĕсем марафон счечĕ çине куçарнă укçа-тенкĕ шучĕ нумай мар пулин те çын нушине ăнланни паха. Пусран вара тенкĕ пухăнать. Тенкĕ çумне тенкĕ хушсан ачалăха хÿтĕлемелли мул пулать.